റീനു മാത്യൂസിന് പ്രായം 52 എന്ന് ​ഗൂ​ഗിൾ, കൃത്യമായ മറുപടി നൽകി താരം

ഇമ്മാനുവേൽ എന്ന സിനിമയിലെ മമ്മൂട്ടിയുടെ നായികയായെത്തിയ ആനിയെ ആരും മറക്കില്ല. എയർഹോസ്റ്റസിൽ നിന്നുമാണ് നടിയായെത്തുന്നത്. മമ്മൂട്ടിയുടെ നായികയായടക്കം അഭിനയിച്ച് വലിയ താരമായി മാറിയെങ്കിലും റീനു തന്റെ ജോലി കെെവിട്ടിട്ടില്ല. സിനിമയിൽ അഭിനയിക്കുമ്പോൾ തന്നെ എയർഹോസ്റ്റസ് ജോലിയും തുടരുകയാണ് റീനു മാത്യൂസ്. മാസത്തിൽ 90 മണിക്കൂർ ജോലിയിലായിരിക്കും. ജോലിയിലെന്നാൽ ആകാശ യാത്രയിൽ.

ഇപ്പോളിതാ റീനുവിനെ സംബന്ധിച്ച മറ്റൊരു കാര്യം സോഷ്യൽ മീഡിയയിൽ ചർച്ചയാവുന്നു. ഗൂഗിളിൽ തിരഞ്ഞാൽ ഈ സുന്ദരിയുടെ പ്രായം 52 എന്നാണ് കാണിക്കുന്നത്. ഇതോടെ സംഭവം സോഷ്യൽ മീഡിയയിലുമെത്തി. റീനു മാത്യൂസ് ഇനി ഫീമെയിൽ മമ്മൂട്ടി ആണോ എന്ന രസകരമായ മീമുകൾ സമൂഹമാധ്യമങ്ങളിൽ നിറയുമ്പോൾ താരസുന്ദരിയുടെ മറുപടി പുഞ്ചിരി മാത്രം. രണ്ടു വർഷമായി ഗൂഗിൾ ജി 52ൽ സ്റ്റക്ക് ആണ്, എന്നായിരുന്നു ഇക്കാര്യം ചൂണ്ടിക്കാട്ടിയ ആരാധകരോട് റീനുവിന്റെ മറുപടി.

താരത്തിന്റെ പേര് ഗൂഗിളിൽ തിരയുമ്പോഴാണ് രസകരമായ വിവരങ്ങൾ പ്രത്യക്ഷപ്പെടുന്നത്. വിക്കിപീഡിയ പേജിൽ വയസ് പരാമർശിച്ചിട്ടില്ലെങ്കിലും ഗൂഗിൾ ചെയ്യുമ്പോൾ വരുന്ന വിവരങ്ങളിൽ റീനുവിന്റെ പ്രായം കാണിക്കുന്നത് 52 എന്നാണ്. ഇൻസ്റ്റഗ്രാമിൽ ഇക്കാര്യം താരത്തിന്റെ പോസ്റ്റുകൾക്ക് താഴെ കമന്റായി ആരാധകർ ചൂണ്ടിക്കാണിക്കുകയും ചെയ്തു. ഗൂഗിൾ പറയുന്ന വിവരം തെറ്റാണെന്നു പറഞ്ഞ റീനു തന്റെ പ്രായം അതിനും ഒരുപാട് താഴെയാണ് എന്നും വ്യക്തമാക്കി. എന്നാൽ, കൃത്യമായ പ്രായം വെളിപ്പെടുത്തിയതുമില്ല.

താരം 30 എത്തിയെന്നും അല്ലെങ്കിൽ അത് കടന്നിട്ടുണ്ടാവുമെന്നും മറ്റു ചില വെബ് പേജുകൾ നൽകുന്ന വിവരങ്ങളുടെ അടിസ്ഥാനത്തിൽ പറയാം. റീനു ജനിച്ച വർഷം 1991 എന്ന് ഏതാനും പേജുകളിൽ പറയുന്നുണ്ട്. എന്നാൽ ഇതിനു സ്ഥിരീകരണമില്ല. ‘എന്നും എപ്പോഴും’ എന്ന സിനിമയിൽ മോഹൻലാലിനൊപ്പവും റീനു വേഷമിട്ടിട്ടുണ്ട്