എഐ ക്യാമറക്കെതിരെയുള്ള ആരോപണങ്ങള്‍, ഉത്തരവാദിത്വം കെല്‍ട്രോണിന്റെ തലയില്‍ വെച്ച് തടിയൂരി മന്ത്രി ആന്റണി രാജു

തിരുവനന്തപുരം. സംസ്ഥാനത്ത് എഐ ക്യാമറകള്‍ സംബന്ധിച്ച് ഉയര്‍ന്ന ആരോപണങ്ങളില്‍ ഉത്തരവാദിത്വം കെല്‍ട്രോണിന്റെ തലയില്‍ വെച്ച് തടിയൂരി മന്ത്രി ആന്റണി രാജു. ക്യാമറകളുടെ വില സംബന്ധിച്ച കാര്യവും സാങ്കേതിക കാര്യങ്ങളും പറയേണ്ടത് കെല്‍ട്രോണ്‍ ആണെന്നാണ് മന്ത്രിയുടെ വാദം. താന്‍ മന്ത്രിയായത് 2021ലാണെന്നും 2018ലാണ് പദ്ധതി കെല്‍ട്രോണിന് നല്‍കിയതെന്നും അതിലാല്‍ പദ്ധതിയുടെ കാര്യങ്ങള്‍ കെല്‍ട്രോണിനോട് ചോദിക്കണമെന്നാണ് മന്ത്രി പറയുന്നത്.

കെല്‍ട്രോണാണ് പദ്ധതി തയ്യാറാക്കിയത് അല്ലാതെ മോട്ടോര്‍വാഹന വകുപ്പല്ല. കെല്‍ട്രോണ്‍ ഒരു സര്‍ക്കാര്‍ സ്ഥാപനമാണ്. ഇത്തരം പദ്ധതികള്‍ നടപ്പാക്കുവാനുള്ള ശേഷി കെല്‍ട്രോണിന് ഉണ്ടെന്നും മന്ത്രി അവകാശപ്പെട്ടു. പദ്ധതിയില്‍ സുതാര്യത കുറവുണ്ടെങ്കില്‍ കെല്‍ട്രോണാണ് മറുപടി പറയേണ്ടത്. സംസ്ഥാനത്ത് സ്ഥാപിച്ച ക്യാമറയുടെ വിലയേക്കുറിച്ചും സാങ്കേതിക കാര്യങ്ങളെക്കുറിച്ചും മോട്ടോര്‍ വാഹന വകുപ്പിന് അറിയില്ലെന്നാണ് മന്ത്രി പറയുന്നത്.

വാഹന അപകടങ്ങള്‍ കുറയ്ക്കുന്നതിനാണ് ക്യാമറകള്‍ സ്ഥാപിച്ചത് എന്നാല്‍ ഇപ്പോള്‍ വാഹനപകടങ്ങള്‍ കുറവാണെന്നും അദ്ദേഹം വ്യക്തമാക്കി. അതേസമയം പദ്ധതിയില്‍ അടിമുടി ദുരൂഹതയുണ്ടെന്നാണ് രമേശ് ചെന്നിത്തല പറയുന്നത്. കെല്‍ട്രോണ്‍ ഉപകരാര്‍ നല്‍കിയ കമ്പനിക്ക് ഇതില്‍ മുന്‍പരിചയമില്ലെന്നും രമേശ് ചെന്നിത്തല പറഞ്ഞിരുന്നു. കമ്പനികള്‍ തമ്മില്‍ ഉണ്ടാക്കിയ കരാറില്‍ 75 കോടിക്ക് പദ്ധതി നടപ്പാക്കാന്‍ സാധിക്കുമെന്നും എന്നാല്‍ പിന്നീട് 232 കോടിയുടെ പദ്ധതിയായതെങ്ങനെയെന്നും അദ്ദേഹം ചോദിച്ചു.