‘2018ല്‍ ആരംഭിച്ച് 2024 വരെ തുടര്‍ന്ന അവിശ്വസനീയമായ യാത്ര’ ; ചിത്രങ്ങള്‍ പങ്കിട്ട് അമല പോള്‍

മലയാളികള്‍ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് ബ്ലെസി- പൃഥ്വിരാജ് കുട്ടുകെട്ടില്‍ എത്തുന്ന ‘ ആടുജീവിതം’. മാര്‍ച്ച് 28ന് ആണ് ചിത്രത്തിന്റെ റിലീസ്. 2018ല്‍ തുടങ്ങിയ ആടുജീവിതത്തിന്റെ യാത്ര പൂര്‍ത്തിയായത് 2024ല്‍ ആണ്. കോവിഡ് അടക്കം പലവിധ പ്രതിസന്ധികളെ മറികടന്നായിരുന്നു ആടുജീവിതത്തിന്റെ യാത്ര.

ആടുജീവിതം യാത്രയെ ഓര്‍മ്മിപ്പിക്കുന്ന രണ്ടു ചിത്രങ്ങള്‍ പങ്കിടുകയാണ് നടി അമല പോള്‍. ‘2018ല്‍ ആരംഭിച്ചതും 2024 വരെ തുടര്‍ന്നതുമായ അവിശ്വസനീയമായ യാത്രയെ പ്രതിഫലിപ്പിക്കുന്ന ചിത്രം. വാക്കുകള്‍ക്കതീതമായ നന്ദി,’ എന്നാണ് പൃഥ്വിയ്ക്ക് ഒപ്പമുള്ള ചിത്രങ്ങള്‍ പങ്കുവച്ച് അമല കുറിച്ചത്.ഒരു ചിത്രം 2018ല്‍ ആടുജീവിതത്തിന്റെ പ്രാരംഭജോലികള്‍ തുടങ്ങിയ കാലത്ത് പകര്‍ത്തിയതാണ്. മറ്റേത്, അടുത്തിടെ ആടുജീവിതം പ്രമോഷനിടയില്‍ പകര്‍ത്തിയതും. കാഴ്ചയില്‍ പോലും വളരെ മാറിപ്പോയ പൃഥ്വിരാജിനെയും അമലേയുമാണ് പുതിയ ചിത്രത്തില്‍ കാണാനാവുക.

പൃഥ്വിരാജിനും അമല പോളിനുമൊപ്പം ജിമ്മി ജീന്‍ ലൂയിസും ചിത്രത്തില്‍ പ്രധാന കഥാപാത്രമാവുന്നുണ്ട്. എ ആര്‍ റഹ്മാന്‍ സംഗീത സംവിധാനവും റസൂല്‍ പൂക്കുട്ടി സൗണ്ട് ഡിസൈനും നിര്‍വ്വഹിക്കുന്ന ചിത്രത്തിന്റെ എഡിറ്റിങ് നിര്‍വ്വഹിച്ചത് ശ്രീകര്‍ പ്രസാദാണ്.