പ്രവചനം തെറ്റിച്ച് ചുഴലിയും ചക്രവാതങ്ങളും

മൂന്നുദിവസത്തിനകം കാലവർഷം എത്തുമെന്നാണ് കേന്ദ്രകലാവസ്ഥവകുപ്പ് പറയുന്നതെങ്കിലും അതിന്റെ മുൻനിരക്കാരായ തണുപ്പുപാളികളുടെ വരവ് ഇനിയും അനുഭവപ്പെടുന്നില്ല. മഴക്കാലത്ത് മുൻപ് പൊതുവേയുണ്ടായിരുന്ന പരക്കെമഴ എന്ന സ്ഥിതിയിൽ കുറച്ചുകാലമായി മാറ്റം വന്നിട്ടുണ്ട്. ഇത്തവണ അതിൽ കൂടുതലായിരിക്കും വ്യതിയാനമെന്ന വിലയിരുത്തലും നടക്കുന്നു. നിലവിൽ താഴേത്തട്ടിൽ കാറ്റിന് തീരെ ശക്തി കുറവെണെന്നാണ് റിപ്പേ‍ാർട്ടുകളും.

കാലവർഷം അതിന്റെ രീതിയിൽ വരുന്നുണ്ടെങ്കിൽ കടൽ ഇളകി തുടങ്ങേണ്ടതാണെന്നു തീരദേശവാസികളും പറയുന്നു. എന്നാൽ കടൽ ഇപ്പേ‍ാഴും ശാന്തമാണെന്നു മാത്രമല്ല തണുപ്പുമില്ല. അറബിക്കടൽ നല്ല ചൂടിലായതിനാൽ മത്സ്യങ്ങളും വളരെ കമ്മിയാണ്. തലമുറകളായുള്ള നിരീക്ഷണ അറിവിൽ നിന്നാണ് ഇവർ കടലിലെ കാലവർഷ ഇളക്കങ്ങളെക്കുറിച്ചു പറയുന്നത്.

അതേസമയം, കാലവർഷക്കാറ്റ് നേരത്തേ ശ്രീലങ്കയിലെത്തിയതായും സംസ്ഥാനത്തേയ്ക്കുള്ള അതിന്റെ വരവ് കാത്തിരിക്കുന്നുവന്നുമാണ് ഐഎംഡി അറിയിപ്പ്. അതിന്റെ മാറ്റങ്ങൾ അടുത്തദിവസം രൂപംകെ‍ാള്ളുമെന്നാണ് വിലയിരുത്തൽ. അങ്ങനയെങ്കിൽ മേയ് 30ഓടെ കാലവർഷമെത്തും. ഒടുവിലത്തെ നിഗമനമനുസരിച്ച് കാലവർഷക്കാറ്റ് കന്യാകുമാരി തീരത്ത് അടുത്തുകെ‍ാണ്ടിരിക്കുന്നു.

കാലവർഷത്തിൽ മഴ കുറയുമെന്നും അതല്ല, കഴിഞ്ഞവർഷത്തെ സ്ഥിതിയുണ്ടായേക്കാമെന്നുമുള്ള നിരീക്ഷണങ്ങളിൽ ഏതായിരിക്കും സംഭവിക്കുകയെന്നു അടുത്തയാഴ്ചയേ‍ാടെ ഏതാണ്ട് സുചന ലഭിക്കും. കാലവർഷതുടക്കം ദുർബലമാവുകയും ഇടവേളയ്ക്കുശേഷം കനത്ത തിരിച്ചുവരവും ഒരു കൂട്ടം കാലാവസ്ഥഗവേഷകർ പ്രതീക്ഷിക്കുന്നുണ്ട്.