‘ഇരുട്ടൻ ചാക്കോ’യിലൂടെ തിലകൻ ചേട്ടനെ പ്രേക്ഷകർ കാണുന്നു.

സുരേഷ് ഗോപിയും ജോഷിയും ഒന്നിച്ച ‘പാപ്പൻ’ എന്ന സിനിമ തീയേറ്ററുകളിൽ തരംഗമാവുമ്പോൾ ചിത്രത്തിൽ ഇരുട്ടൻ ചാക്കോ എന്ന കഥാപാത്രമായി ശ്രദ്ധേയ പ്രകടനം നടത്തിയിരിക്കുന്ന ഷമ്മി തിലകൻ പ്രശംസ പിടിച്ചു പറ്റുകയാണ്. ഷമ്മി തിലകൻ പാപ്പാനിൽ ഏവരേയും വിസ്മയിപ്പിക്കുന്ന പ്രകടനമാണ് കാഴ്ചവെച്ചിരി ക്കുന്നത്. സോഷ്യൽമീഡിയയിൽ പലരും നടന് അഭിനന്ദനങ്ങൾ അറിയിക്കുകയാണ്. ഒപ്പം ഇതാ സംവിധായകൻ വിനോദ് ഗുരുവായൂർ ഷമ്മി തിലകനെ കുറിച്ച് ഫേസ്ബുക്കിൽ കുറിച്ച വാക്കുകള്‍ ശ്രദ്ധ നേടുകയാണ്.

‘നമുക്ക് നഷ്ടമായ തിലകൻ ചേട്ടൻ തിരിച്ചു വന്നിരിക്കുന്നു, അദ്ദേഹത്തിന്‍റെ മകനിലൂടെ… പാപ്പനിൽ. അധികം സീനിലൊന്നും ചാക്കോ എന്ന ഷമ്മി ചേട്ടൻ ഇല്ലെങ്കിൽ കൂടി, സിനിമയിൽ നിറഞ്ഞു നിൽപ്പുണ്ട് ചാക്കോ. ജോഷി സർ ലോഹിതദാസ് സർ ടീം ഒരുക്കിയ കൗരവർ എന്ന സിനിമയിലെ തിലകൻ ചേട്ടനെ ഇന്നും മനസ്സിൽ സൂക്ഷിച്ചിട്ടുണ്ട്. അതുപോലെ ചാക്കോ വർഷങ്ങൾ കഴിഞ്ഞാലും നമ്മുടെ മനസ്സിലുണ്ടാകും.

തിലകൻ ചേട്ടനോളൊപ്പം എന്നല്ല. എന്നാലും അദ്ദേഹം ചെയ്തിരുന്ന വേഷങ്ങൾ നമുക്ക് ധൈര്യമായി ഇദ്ദേഹത്തെ ഏല്പിക്കാം… മോശമാക്കില്ല…. ഭാവിയിൽ തിലകൻ ചേട്ടന് മുകളിൽ നിൽക്കുന്ന മകനെ മലയാള സിനിമ ഉപയോഗിക്കട്ടെ.. ജോഷി സർ പല നടന്മാരുടെയും, അവരുടെ ബെസ്റ്റ് നമുക്ക് കാണിച്ചു തന്നിട്ടുണ്ട്, ഇപ്പോൾ ഷമ്മി തിലകന്‍റെ ഇരുട്ടൻ ചക്കോയും’ വിനോദ് ഗുരുവായൂർ ഫേസ്ബുക്കിൽ കുറിച്ചിരിക്കുന്നു.

ഷമ്മി തിലകൻ കഴിഞ്ഞ ദിവസം സംവിധായകൻ ജോഷിക്ക് നന്ദിയര്‍പ്പിച്ച് സോഷ്യൽമീഡിയയിൽ കുറിപ്പ് പങ്കുവെച്ചിരുന്നു. ‘നന്ദി_ജോഷിസർ, എനിക്ക് നൽകുന്ന “കരുതലിന്”, എന്നെ പരിഗണിക്കുന്നതിന്..! എന്നിലുള്ള വിശ്വാസത്തിന്..!,’ എന്നാണ് ഷമ്മി തിലകൻ ഫേസ്ബുക്കിൽ കുറിച്ചത്.

പാപ്പനെ പ്രേക്ഷകരും ഇരുകൈയും നീട്ടി സ്വീകരിച്ചിരിക്കുകയാണ്. മിക്ക എല്ലാ തീയേറ്ററുകളിലും ഹൗസ് ഫുൾ ഷോയുമായാണ് പാപ്പൻ മുന്നേറുന്നത്. ഇതിനകം 11.56 കോടിയിലൂടെ കളക്ഷൻ ആണ് ചിത്രം സ്വന്തമാക്കിയിരിക്കുന്നത്. ആദ്യ ദിവസം ചിത്രം 3.16 കോടി കളക്ഷൻ നേടി. സുരേഷ് ഗോപിയുടെ എക്കാലത്തെയും മികച്ച ഓപ്പണിംഗ് കളക്ഷൻ കൂടിയായിരുന്നു ഇത് എന്നതും ശ്രദ്ധേയം.