35 വര്‍ഷത്തെ ആത്മബന്ധം, അച്ചായനെ അവസാനമായി കാണാന്‍ ബീനയും എത്തി, വികാര നിര്‍ഭരം

അവളുടെ വളയം പിടിക്കാന്‍ ഇനി അച്ചായനില്ല. നാളുകളായി തന്റെ വളയം പിടിച്ച് സുരക്ഷിതമായി കൊണ്ടു നടന്ന അച്ചായനെ അവസാനമായി ഒരു നോക്ക് കാണാന്‍ അവളും എത്തി. ഒരു ബസും ഡ്രൈവറും തമ്മിലുള്ള ആത്മബന്ധം അതായിരുന്നു ഈ വരികളില്‍. കഴിഞ്ഞ ദിവസം സോഷ്യല്‍ മീഡിയകളില്‍ നിറഞ്ഞത് ഇതായിരുന്നു. കോട്ടയം – അയര്‍ക്കുന്നം – മറ്റക്കര – പാലാ റൂട്ടിലോടുന്ന ബീനാ ബസിന്റെ ഡ്രൈവറായിരുന്നു കുഞ്ഞുമോന്‍ ചേട്ടന്‍.

സ്വന്തം മകളെ പോലെയാണ് അദ്ദേഹം ബസിനെ സ്‌നേഹിച്ചത്. ആ ഡ്രൈവറുടെ സംസ്‌കാര ചടങ്ങില്‍ അവസാനമായി പള്ളിക്ക് മുന്നിലേക്ക് ആ ബസും ഓടിയെത്തി. 35 വര്‍ഷത്തെ ആത്മബന്ധത്തിനൊടുവില്‍ വികാര നിര്‍ഭരമായ അപൂര്‍വ വിടപറയലിന് ചൊവ്വാഴ്ച പൂമറ്റം പള്ളി സാക്ഷിയായി.

നാട്ടുകാര്‍ കുഞ്ഞുമോന്‍ ചേട്ടന്‍ എന്ന് വിളിക്കുന്ന ആനത്താനം പള്ളിനീരാക്കല്‍ ജോര്‍ജ് ജോസഫ്(72) 35 വര്‍ഷം ബീനയുടെ സാരധിയായിരുന്നു. ഇടയ്ക്ക് കെഎസ്ആര്‍ടിസിയില്‍ കുഞ്ഞുമോന്‍ ഡ്രൈവറായി പോയെങ്കിലും ബിനയുമായുള്ള ബന്ധത്തിന് ഉലച്ചില്‍ സംഭവിച്ചിരുന്നില്ല. വിരമിച്ച ശേഷം ബീനയുടെ സാരധിയായി അച്ചായന്‍ തിരികെയെത്തി.

പിരിച്ചുകയറ്റിയ മീശയും സരസമായ ഇടപെടലുംകൊണ്ട് ആരെയും ആകര്‍ഷിക്കുന്ന പ്രകൃതമായിരുന്നു. അതുകൊണ്ട് നാട്ടുകാര്‍ക്കും പ്രിയങ്കരനായിരുന്നു അദ്ദേഹം. പ്രായത്തെ വെല്ലുന്ന ഊര്‍ജവും കൃത്യനിഷ്ഠയുമായിരുന്നു അച്ചായന്റെ പ്രത്യേകതയെന്ന് ബീനാ ബസിന്റെ ഉടമ ബോബി മാത്യു പറയുന്നു. ‘അച്ചായനുമായുള്ള ബന്ധം മറക്കാനാവില്ല. അതുകൊണ്ടാണ് സംസ്‌കാരച്ചടങ്ങില്‍ ബസും കൊണ്ടുവന്നിട്ടത്. ആദ്യമായി വേളാങ്കണ്ണി സര്‍വീസിന് വോള്‍വോ ബസ് എടുത്തപ്പോഴും അച്ചായന്‍ തന്നെയാണ് ഓടിച്ചത്” ബോബി മാത്യു പറഞ്ഞു.