ബിജെപിയുടെ ആദ്യഘട്ട സ്ഥാനാര്‍ഥി പട്ടിക വ്യാഴാഴ്ച പുറത്തിറക്കും, 100 പേരുടെ പട്ടികയാണ് പുറത്തിറക്കുക

ന്യൂഡല്‍ഹി. 2024ലെ ലോക്‌സഭാ തിരഞ്ഞെടുപ്പിനായുള്ള ബിജെപിയുടെ ആദ്യഘട്ട സ്ഥാനാര്‍ഥി പട്ടിക വ്യാഴാഴ്ച പുറത്തിറക്കും. തിരഞ്ഞെടുപ്പ് പ്രഖ്യാപനം അടുത്തമാസം നടക്കാനിരിക്കെയാണ് 100 പേരുടെ ആദ്യഘട്ട പട്ടിക ബിജെപി പുറത്തിറക്കുന്നത്. പാര്‍ട്ടിയുടെ ഏറ്റവും ഉന്നത നേതാക്കളായ പ്രധാനമന്ത്രി നരേന്ദ്രമോദിയുടെയും ആഭ്യന്തരമന്ത്രി അമിത് ഷായും ആദ്യപട്ടികയില്‍ ഉള്‍പ്പെടും.

അതേസമയം ബിജെപിയുടെ കേന്ദ്ര തിരഞ്ഞെടുപ്പ് സമിതി വ്യാഴാഴ്ച യോഗം ചേരും. യോഗത്തിന് ശേഷമായിരിക്കും ആദ്യ ഘട്ടസ്ഥാനാര്‍ഥി പ്രഖ്യാപനം. ലോക്‌സഭയില്‍ 370 സീറ്റുകള്‍ നേടണമെന്നാണ് ബിജെപിയുടെ ലക്ഷ്യം. എന്‍ഡിഎ മുന്നണി 400 സീറ്റുകള്‍ നേടുമെന്നും പ്രധാനമന്ത്രി നരേന്ദ്രമോദി പറഞ്ഞിരുന്നു.

ബിജെപിക്ക് 370 സീറ്റും എന്‍ഡിഎയ്ക്ക് 400 സീറ്റും ലഭിക്കുമെന്ന് ലോക്‌സഭയിലാണ് പ്രധാനമന്ത്രി നരേന്ദ്രമോദി പറഞ്ഞത്. ഇന്ത്യ മുന്നണിക്ക് തിരഞ്ഞെടുപ്പില്‍ മത്സരിക്കാനുള്ള ധൈര്യം നഷ്ടപ്പെട്ടുവെന്നും അദ്ദേഹം അന്ന് പറഞ്ഞിരുന്നു.