പ്രധാനമന്ത്രിയുടെ സുരക്ഷ പദ്ധതി ചോർന്ന സംഭവത്തിൽ കേസെടുത്ത് പോലീസ്

തിരുവനന്തപുരം. പ്രധാനമന്ത്രി നരേന്ദ്ര മോദിയുടെ കേരള സന്ദര്‍ശനത്തിന്റെ സുരക്ഷ പദ്ധതി ചോര്‍ന്നതില്‍ പോലീസ് കേസെടുത്തു. ഔദ്യോഗിക രഹസ്യ നിയമപ്രകാരമാണ് പോലീസ് കേസ് രജിസ്ട്രര്‍ ചെയ്തിരിക്കുന്നത്. അതേസമയം ആരെയും പ്രതിചേര്‍ത്തിട്ടില്ല. തിരുവനന്തപുരം കന്റോണ്‍മെന്റ് പോലീസാണ് കേസ് എടുത്തിരിക്കുന്നത്.

പ്രധാനമന്ത്രിയുടെ സുരക്ഷാ ക്രമീകരണവും ഉദ്യോഗസ്ഥ വിന്യാസവും വിശദീകരിച്ച് പോലീസ് ഇന്റലിജന്‍സ് മേധാവി തയ്യാറാക്കിയ റിപ്പോര്‍ട്ടാണ് ചോര്‍ന്നത്. പോലീസിന്റെ ഭാഗത്ത് നിന്നും ഉണ്ടായ വീഴ്ചയില്‍ എസ്പിജി അടക്കമുള്ള കേന്ദ്ര ഏജനില്‍സികള്‍ കടുത്ത അതൃപ്തി അറിയിച്ചിരുന്നു. ഇതേ തുടര്‍ന്ന് പ്രധാനമന്ത്രിയുടെ സുരക്ഷ പുനക്രമീകരിക്കുകയായിരുന്നു.

സുരക്ഷ ഒരുക്കുന്ന ഉദ്യോഗസ്ഥരുടെ വിവരങ്ങള്‍ പ്രധാനമന്ത്രി പോകുന്ന വഴികള്‍, വിശ്രമിക്കുന്ന സ്ഥലങ്ങള്‍, ഭക്ഷണം പരിശോധിക്കുവാന്‍ ചുമതലപ്പെടുത്തിയവര്‍ അടക്കമുള്ളവരുടെ വിവരമാണ് ചോര്‍ന്നത്. പ്രധാനമന്ത്രിക്കെതിരെ ആക്രമണം ഉണ്ടാകുമെന്ന കത്തിലെ വിവരങ്ങളും ഉള്‍പ്പെടുത്തിയിരുന്നു. പ്രധാനമന്ത്രിയുടെ സുരക്ഷ ചുമതയില്‍ എസ്പിറാങ്കിലുള്ള ഉദ്യോഗസ്ഥനാണ് റിപ്പോര്‍ട്ട് കൈമാറിയത്.

ഇത് സംബന്ധിച്ച വാര്‍ത്ത പുറത്ത് വന്നതോടെയാണ് റിപ്പോര്‍ട്ട് ചോര്‍ന്നുവെന്ന് പുറത്തുവന്നത്. തുടര്‍ന്ന് സുരക്ഷാ പദ്ധതി സന്ദേശം വാട്‌സാപ് വഴി പുറത്തുകൊടുത്ത പോലീസ് ഉദ്യോഗസ്ഥനെ കണ്ടെത്തി നീരിക്ഷണത്തിലാക്കി. ഒരു ഡിവൈഎസ്പിയുടെ ഓഫീസിലെ സിവില്‍ പോലീസ് ഓഫിസറാണ് വാട്‌സാപ് വഴി വിതരണം ചെയ്തതെന്നാണ് വിവരം. ഇയാള്‍ക്കെതിരെ നടപടി സ്വീകരിക്കുന്നതിന് തീരുമാനിച്ചിട്ടുണ്ട്.