ചന്ദ്രയാൻ 3 പകർത്തിയ ചന്ദ്രന്റെ ചിത്രം പുറത്തുവിട്ട് ഐഎസ്ആർഒ

ചെന്നൈ. ചന്ദ്രയാന്‍ മൂന്ന് പകര്‍ത്തിയ ചന്ദ്രന്റെ ആദ്യ ചിത്രങ്ങള്‍ പുറത്തുവന്നു. ചാന്ദ്രന്റെ ഭ്രമണപഥത്തിലേക്ക് കടക്കുന്നതിനിടെ പകര്‍ത്തിയ ചിത്രമാണ് ഐഎസ്ആര്‍ഒ പുറത്ത് വിട്ടത്. ശനിയാഴ്ച രാത്രിയാണ് ചന്ദ്രയാന്‍ മൂന്ന് ചന്ദ്രന്റെ ഭ്രമണപഥത്തില്‍ എത്തിയത്. പേടകത്തിലെ ലാം എന്‍ജിന്‍ 29 മിനിറ്റ് ജ്വലിപ്പിച്ചാണ് ചന്ദ്രയാന്‍ മൂന്ന് ചന്ദ്രന്റെ ഭ്രമണപഥത്തില്‍ എത്തിയത്.

ഇനി ചന്ദ്രന്റെ ഉപരിതലത്തോട് ഘട്ടങ്ങളായി അടുക്കും. ആദ്യ ഭ്രമണപഥം താഴ്ത്തല്‍ പ്രക്രിയ ഞായറാഴ്ച നടക്കും. ജൂലൈ 14 ശ്രീഹരിക്കോട്ടയില്‍ നിന്നും വിക്ഷേപിച്ച ചന്ദ്രയാന്‍ മൂന്ന് 22 ദിവസം കൊണ്ടാണ് ചന്ദ്രന്റെ ഭ്രമണപഥത്തില്‍ എത്തിയത്.

ഇനി അഞ്ച് ഘട്ടങ്ങളായിട്ടാണ് ഭ്രമണപഥം താഴ്ത്തുന്നത്. 17ന് പ്രോപ്പല്‍ഷന്‍ മൊഡ്യൂളില്‍ നിന്നും ലാന്‍ഡര്‍ വേര്‍പെടും. തുടര്‍ന്ന് ഓഗസ്റ്റ് 23ന് വിക്രം ലാന്‍ഡര്‍ ചന്ദ്രനില്‍ ഇറക്കാന്‍ ഉദ്ദേശിക്കുന്നത്. അഞ്ച് ദിവസം ഭൂമിയുടെയും ചന്ദ്രന്റെയും സ്വാധീനമില്ലാത്ത ലൂണാര്‍ ട്രാന്‍സ്ഫര്‍ ട്രാജക്ട്രി എന്ന പഥത്തിലൂടെ സഞ്ചരിച്ചാണ് ചാന്ദ്രന്റെ ഭ്രമണപഥത്തില്‍ പേടകം എത്തിയത്.