ഡോ.ഷീന ഷുക്കൂറിന്റെ ഗവേഷണ പ്രബന്ധത്തിനെതിരെ ആരോപണം ; പകര്‍ത്തിയെഴുത്തെന്ന് പരാതി

ഡോ.ഷീന ഷുക്കൂറിന്റെ ഗവേഷണ പ്രബന്ധത്തെ കുറിച്ച് ഗവർണർക്ക് പരാതി. കണ്ണൂർ സർവകലാശാല നിയമ വകുപ്പ് മേധാവിയും എം ജി സർവകലാശാല മുൻ പി.വി.സിയുമായ ഡോ.ഷീന ഷുക്കൂറിന്റെ ഗവേഷണ പ്രബന്ധത്തിലെ ചില ഭാഗങ്ങൾ പകർത്തിയെഴുത്താണെന്നും യു.ജി.സി മാനദണ്ഡങ്ങൾ ലംഘിച്ചാണ് ഗവേഷണ പഠനം നടത്തിയതെന്നും ആരോപിച്ച് സേവ് യൂണിവേഴ്സിറ്റി സമിതിയാണ് ഗവർണർക്കും കണ്ണൂർ സർവകലാശാല വൈസ്ചാൻസലർക്കും പരാതി നൽകിയത്.

കേരളത്തിലെയും ലക്ഷദ്വീപിലെയും മുസ്ലിം കുടുംബനിയമത്തിന്റെ സാധുതയും പ്രയോഗവും എന്ന വിഷയത്തിൽ 2009 ലാണ് ഷീന ഷുക്കൂർ തമിഴ് നാട് അംബേദ്ക്കർ സർവലാശാലയിൽ നിന്ന് പി. എച്ച്.ഡി നേടിയത്. മുസ്‌ലിം പിന്തുടർച്ചവകാശ നിയമപ്രകാരം പെൺമക്കൾക്ക് പൂർണ സ്വത്തവകാശം കിട്ടണമെന്ന നിലപാടിന്റെ ഭാഗമായി അഭിഭാഷകനും സിനിമാ താരവുമായ സി.ഷുക്കൂറും ഭാര്യ ഷീന ഷുക്കൂറും രണ്ട് ദിവസം മുൻപ് രണ്ടാമതും വിവാഹിതരായിരുന്നു.

ഈ നടപടിയെ സമുദായം തന്നെ എതിർക്കുകയും വിമർശിക്കുകയും ഉണ്ടായി. സ്പഷ്യൽ മാര്യേജ് ആക്ട് പ്രകാരം ബസുക്കളെയും സഹപ്രവർത്തകരെയും സാക്ഷികളാക്കിയാണ് ഇരുവരും 28 വർഷങ്ങൾക്ക് ശേഷം വീണ്ടും വിവാഹിതരായത്. വിമർശനങ്ങൾക്ക് പിന്നാലെയാണ് ഇപ്പോൾ ഷീന ഷുക്കൂറിന്റെ ഗവേഷണ പ്രബന്ധത്തിനെതിരെ ആരോപണം ഉയർന്നിരിക്കുന്നത്.