ഷാരോണ്‍ വധക്കേസില്‍ പ്രതി ഗ്രീഷ്മയുടെ ജാമ്യാപേക്ഷ കോടതി തള്ളി

തിരുവനന്തപുരം. ഷാരോണ്‍ വധക്കേസില്‍ ഒന്നാം പ്രതിയായ ഗ്രീഷ്മയുടെ ജാമ്യാപേക്ഷ കോടതി തള്ളി. കേരളത്തില്‍ വലിയ വിവാദം ഉണ്ടാക്കിയ കേസായിരുന്നു ഷാരോണ്‍ വധക്കേസ്. കേസ് പോലീസ് തെളിയിച്ചത് മുതല്‍ കേസിലെ ഒന്നാം പ്രതിയായ ഗ്രീഷ്മ അട്ടക്കുളങ്ങരയിലെ ജയിലിലാണ് കഴിയുന്നത്. ഗ്രീഷ്മയെ ജുഡീഷ്യല്‍ കസ്റ്റഡിയില്‍ താമസിപ്പിച്ച് വിചാരണ നടത്തണമെന്ന് കോടതിയില്‍ ഷാരോണിന്റെ കുടുംബം ആവശ്യപ്പെട്ടിരുന്നു.

ഇത് കോടതി അംഗീകരിക്കുകയും ചെയ്തു. എന്നാല്‍ ഈ കാലയളവില്‍ പ്രതിക്ക് ജാമ്യാപേക്ഷ നല്‍കാമെന്ന് കോടതി പറഞ്ഞിരുന്നു. ഇതിന്റെ അടിസ്ഥാനത്തിലാണ് കോടതിയില്‍ പ്രതി ജാമ്യത്തിന് അപേക്ഷ നല്‍കിയത്. അതേസമയം കേസിന്റെ വിചാരണ നടപടി വൈകാതെ ആരംഭിക്കുമെന്നാണ് വിവരം. കേസ് ആദ്യം പാറശ്ശാല പോലീസും പിന്നീട് ക്രൈംബ്രാഞ്ചുമാണ് അന്വേഷിച്ചത്. കീടനാശിനി കയ്പുള്ള കഷായത്തില്‍ കലര്‍ത്തി നല്‍കി കൊലപ്പെടുത്തി എന്നാണ് കേസ്.

കൊലപ്പെടുത്തണമെന്ന ഉദ്ദേശത്തോടെ ഷാരോണ്‍ രാജിനെ സെക്‌സ് ചാറ്റിലൂടെ വീട്ടിലേക്ക് വിളിച്ച് വരുത്തി വിഷം നല്‍കുകയായിരുന്നു. കേസില്‍ അമ്മ സിന്ധുവും അമ്മാവന്‍ നിര്‍മല കുമാരനും തെളിവ് നശിപ്പിക്കാന്‍ സഹായിച്ചുവെന്നും കുറ്റപത്രത്തില്‍ പറയുന്നു. ഗ്രീഷ്മയുടെ ആദ്യ ഭര്‍ത്താവ് മരിച്ച് പോകുമെന്ന് ജാതകത്തില്‍ ഉണ്ടായിരുന്നു. തുടര്‍ന്ന് ഷാരോണുമായി ഇവര്‍ രഹസ്യ വിവാഹം നടത്തി. പിന്നീട് ആദ്യ വിവാഹം ഒഴിപ്പിക്കുവാന്‍ ഇവര്‍ കൊലപാതകവും നടത്തിയെന്നാണ് പോലീസ് പറയുന്നത്.