കൊറോണ മരണം; നഷ്ടപരിഹാരം നല്‍കുന്നതിനുള്ള മാര്‍ഗരേഖ പുതുക്കുമെന്ന് ആരോഗ്യമന്ത്രി

തിരുവനന്തപുരം: കൊറോണ ബാധിച്ച്‌ മരിച്ചവരുടെ കുടുംബങ്ങള്‍ക്കുള്ള നഷ്ടപരിഹാരം നിശ്ചയിക്കാനുള്ള മാര്‍ഗരേഖ പുതുക്കുമെന്ന് ആരോഗ്യമന്ത്രി വീണ ജോര്‍ജ്ജ്. രോഗം ബാധിച്ച്‌ മരിച്ചവരുടെ സമഗ്ര പട്ടിക പ്രസിദ്ധീകരിക്കും. നിലവിലെ പട്ടികയില്‍ മാറ്റം ഉണ്ടാകും.

ഇതിന് ആരോഗ്യവകുപ്പ് തന്നെ മുന്‍കൈ എടുക്കും. പരമാവധി പേര്‍ക്ക് സഹായം കിട്ടാനുള്ള നടപടി സ്വീകരിക്കുമെന്നും മന്ത്രി പറഞ്ഞു. കേന്ദ്രസര്‍ക്കാരിന്റെ മാര്‍ഗനിര്‍ദ്ദേശം അനുസരിച്ചായിരിക്കും സംസ്ഥാന സര്‍ക്കാര്‍ കൊറോണ മരണം സംബന്ധിച്ചുള്ള മാര്‍ഗരേഖ പുതുക്കുന്നത്. ഇതിന് ആവശ്യമായ നടപടിക്രമങ്ങളും പൂര്‍ത്തിയായിട്ടുണ്ട്.

കൊറോണ സ്ഥിരീകരിച്ച്‌ 30 ദിവസത്തിനകം മരിച്ചാല്‍ അത് കൊറോണ മരണമായി കണക്കാക്കാമെന്ന് കേന്ദ്രസര്‍ക്കാര്‍ പറഞ്ഞിരുന്നു. ഇത് കൂടി പരിഗണിച്ചാകും പുതിയ മാര്‍ഗരേഖ തയ്യാറാക്കുകയെന്നും മന്ത്രി വ്യക്തമാക്കി.

കഴിഞ്ഞ കുറച്ച്‌ മാസങ്ങളായി ഇന്ത്യയില്‍ ഏറ്റവും അധികം കൊറോണ രോഗികള്‍ റിപ്പോര്‍ട്ട് ചെയ്യപ്പെടുന്നത് കേരളത്തിലാണ്. മരണനിരക്കും സംസ്ഥാനത്ത് ഉയര്‍ന്നാണ് നില്‍ക്കുന്നത്. ഇന്നലെ 19,675 പേര്‍ക്കാണ് കൊറോണ സ്ഥിരീകരിച്ചത്. 142 മരണങ്ങളും ഇന്നലെ സ്ഥിരീകരിച്ചു. നിലവിലെ കണക്കുകള്‍ പ്രകാരം സംസ്ഥാനത്തെ ആകെ മരണം 24,039 ആണ്.