റോഡിലെ കുഴി അപകടകാരണമായി, ആറ്റിങ്ങൽ ബൈപ്പാസിൽ കാ‌ർ മറിഞ്ഞ് ഒരാൾ മരിച്ചു

തിരുവനന്തപുരം : റോഡിലെ കുഴി തിരുവോണ നാളിലും യുവാവിന്റെ ജീവനെടുത്തു. ആറ്റിങ്ങൽ ബൈപ്പാസിൽ റോഡ് നിർമാണത്തിനായി എടുത്ത കുഴിയിൽ കാർ മറിഞ്ഞ് ഒരാൾ മരിച്ചു. ഇന്നലെ രാത്രി പതിനൊന്നരയോടെയായിരുന്നു അപകടമുണ്ടായത്. കാറിൽ ആറുപേർ ഉണ്ടായിരുന്നു. പാലച്ചിറ സ്വദേശി ഡൊമിനിക് സാബു (23) ആണ് മരിച്ചത്. കിളിമാനൂർ സ്വദേശി അക്ഷയ്, അക്ഷയ്, കടയ്ക്കാവൂർ സ്വദേശികളായ ബ്രൗൺ, സ്റ്റീഫൻ, വക്കം സ്വദേശി വിഷ്ണു എന്നിവർക്കാണ് പരിക്കേറ്റത്.

കടയ്‌ക്കാവൂർ ഭാഗത്തുനിന്ന് ആലംകോട് ഭാഗത്തേയ്ക്ക് പോവുകയായിരുന്ന വാഹനമാണ് അപകടത്തിൽപ്പെട്ടത്. പരിക്കേറ്റവരെ ആശുപത്രിയിലേയ്ക്ക് മാറ്റി. ഡൊമിനിക് സംഭവസ്ഥലത്തുതന്നെ മരണപ്പെട്ടു. കുഴിയെടുത്ത ഭാഗത്ത് സൈൻ ബോർഡുകൾ ഇല്ലായിരുന്നു. ഇതായിരുന്നു അപകടത്തിന് കാരണമായത്. അതേസമയം, പത്തനംതിട്ട കുളനടയിൽ ഉണ്ടായ വാഹനാപകടത്തിൽ രണ്ടുപേർ മരിച്ചു.

അഞ്ചലിൽ നിന്ന് കോട്ടയത്തേയ്ക്ക് പോവുകയായിരുന്ന ജീപ്പ് നിയന്ത്രണം വിട്ട് കെ എസ് ആർ ടി സി സ്വിഫ്റ്റ് ബസിൽ ഇടിക്കുകയായിരുന്നു. ഇന്നലെ രാത്രിയായിരുന്നു സംഭവം. അഞ്ചൽ സ്വദേശികളായ ലതിക, ജീപ്പ് ഡ്രൈവർ അരുൺ കുമാർ എന്നിവരാണ് മരിച്ചത്. ഇരുവരും ബന്ധുക്കളാണ്. കോട്ടയത്ത് മരണാനന്തര ചടങ്ങിൽ പങ്കെടുക്കാൻ പോവുകയായിരുന്നു. ജീപ്പിൽ എട്ടുപേരാണ് ഉണ്ടായിരുന്നത്. അരുൺ കുമാറും ലതികയും സംഭവസ്ഥലത്തുതന്നെ മരണപ്പെടുകയായിരുന്നു. പരിക്കേറ്റ മറ്റുള്ളവരെ ആശുപത്രിയിലേയ്ക്ക് മാറ്റി.