വേണുവായി 14 വർഷം നീണ്ടുനിന്ന പിണക്കത്തെ കുറിച്ച്‌ വെളിപ്പെടുത്തി സത്യൻ അന്തിക്കാട്

നെടുമുടി വേണുവിന്റെ മരണത്തിന്റെ വേദനയിൽ നിന്നും സഹതാരങ്ങൾ ഇതുവരെ മോചിതരായിട്ടില്ല. സംവിധായകൻ സത്യൻ അന്തിക്കാടും നെടുമുടി വേണുവും അടുത്ത സുഹൃത്തുക്കളായിരുന്നു. തങ്ങൾക്കിടയിൽ 14 വർഷത്തോളം നീണ്ടുനിന്ന അകൽച്ചയെക്കുറിച്ച് പറയുകയാണ് താരം. വാക്കുകൾ,

ഞാൻ അമേരിക്കയിൽവെച്ചു ചെയ്‌തൊരു സിനിമയുടെ ഭാഗമാവാൻ അദ്ദേഹത്തിനു സാധിച്ചില്ല. ഞാനാകെ വിഷമിച്ചുപോയി. അദ്ദേഹം വരാഞ്ഞതിനെത്തുടർന്ന് കഥയൊക്കെ മാറ്റി. ആകെ കുളമായിപ്പോയി. പിന്നെ ഞാൻ കുറേനാളത്തേക്ക് അദ്ദേഹത്തെ വിളിച്ചില്ല. എത്രനാൾ വൈകി എന്നൊന്നും എനിക്കറിയില്ലായിരുന്നു. ഒരു സംസ്ഥാന ചലച്ചിത്ര അവാർഡ് ചടങ്ങിനെത്തിയ വേണു എന്റെ അടുത്തുവന്നു സത്യന്റെ സിനിമയിൽ ഞാൻ അഭിനയിച്ചിട്ട് 14 വർഷങ്ങളായി എന്നു പറഞ്ഞു. ഒരാളെ കൊന്നാൽ 12 വർഷമേയുള്ളൂ ശിക്ഷ. എന്റെ ശിക്ഷ കഴിയാറായോ’ എന്നു തമാശയായി ചോദിച്ചു. എന്റെ അടുത്ത സിനിമ മുതൽ വേണു വീണ്ടും എന്റെ കൂടെയുണ്ടായിരുന്നു. ‘വീണ്ടും ചില വീട്ടുകാര്യങ്ങളി’ൽ അരവിന്ദൻ എന്ന കഥാപാത്രമായി, ‘ഭാഗ്യദേവത’യിലെ സദാനന്ദൻ പിള്ളയായി.

ഒരിക്കലും നമ്മെ പിണങ്ങാൻ അനുവദിക്കാത്ത സൗഹൃദമായിരുന്നു വേണുവുമായിട്ട്. വേണു സെറ്റിലുണ്ടെങ്കിൽ ആ സെറ്റ് സജീവമായിരിക്കും. ഈയടുത്ത് എന്നെ വിളിച്ചിരുന്നു. ‘ഇടയ്ക്കിടെ ഒന്നു കോൺടാക്‌ട് ചെയ്യേണ്ടേ. അപ്പോഴല്ലേ ജീവിച്ചിരിക്കുന്നു എന്നു പരസ്പരം അറിയുള്ളൂ’ എന്നായിരുന്നു ‘എന്തേ വിളിച്ചത്’ എന്ന ചോദ്യത്തിന് വേണുവിന്റെ മറുപടി. പഴയ കഥകൾ പറഞ്ഞു കുറേനേരം ചിരിച്ചു.