കോവിഡ് പോസിറ്റീവ്,ആംബുലൻസിലിരുന്ന് പരീക്ഷയെഴുതി ഡോക്ടർ‌

കോവിഡ് പോസിറ്റീവായതിനെത്തുടർന്ന് ആംബുലൻസിലിരുന്ന് പരീക്ഷയെഴുതി ഡോക്ടർ.പിഎസ്‌സി കഴിഞ്ഞ ദിവസം നടത്തിയ അസിസ്റ്റന്റ് സർജൻ/കാഷ്വൽറ്റി മെഡിക്കൽ ഓഫീസർ പരീക്ഷയെഴുതാനാണ് കൊവിഡ് പോസിറ്റീവായ ഡോക്ടറുമെത്തിയത്.ആദ്യം പരീക്ഷയെഴുതാൻ കഴിയില്ലെന്ന് വിശ്വസിച്ചെങ്കിലും കണ്ണൂർ ഗവ.ടിടിഐ സെന്ററിലെത്തി പരീക്ഷ എഴുതുകയായിരുന്നു.കൊവിഡ് പോസിറ്റീവായതിനെ തുടർന്നു കണ്ണൂരിലെ സ്വകാര്യ ആശുപത്രിയിൽ ചികിത്സയിലായിരുന്നു ഇദ്ദേഹം.ഡോക്ടറാണെന്ന സാഹചര്യം പരിഗണിച്ചാണ് പരീക്ഷയെഴുതാൻ പിഎസ്‌സി അവസരം നൽകിയത്.

പരീക്ഷാകേന്ദ്രത്തിലെ വളപ്പിൽ പാർക്ക് ചെയ്തിരുന്ന ആംബുലൻസിലേക്ക് ആരോഗ്യവകുപ്പ് ഉദ്യോഗസ്ഥരാണു ചോദ്യവും മറ്റും എത്തിച്ചു നൽകിയത്.ആദ്യം എറണാകുളത്തെ സെന്ററായിരുന്നു തനിക്ക് അനുവദിച്ചിരുന്നതെന്നും പിന്നീട് കണ്ണൂരിലേക്ക് തന്നെ സെന്റർ മാറ്റി നൽകിയെന്നും ഡോക്ടർ പറഞ്ഞു.4ദിവസം മുമ്പാണ് കൊവിഡ് പോസിറ്റീവായത്.

വിവരം അറിഞ്ഞയുടൻ തന്നെ പിഎസ്‌സി ബോർഡിൽ വിളിച്ചു കാര്യം പറഞ്ഞെങ്കിലും പരീക്ഷ എഴുതാൻ സാധിക്കില്ലെന്നായിരുന്നു ആദ്യം അവരുടെ നിലപാട്.എന്നാൽ പിന്നീടു നടന്ന ബോർഡ് മീറ്റിങ്ങിൽ ഇക്കാര്യം ചർച്ച ചെയ്യുകയും പരീക്ഷയുടെ തലേന്നു രാവിലെ ബോർഡ് മെമ്പർ തന്നെ പരീക്ഷ എഴുതാമെന്ന കാര്യം എന്നെ വിളിച്ച് അറിയിക്കുകയായിരുന്നു.സൗകര്യാർത്ഥം കണ്ണൂരിലേക്കു സെന്റർ മാറ്റി നൽകുകയും ചെയ്തെന്ന് ഡോക്ടർ വ്യക്തമാക്കി