താലിബാന്റെ മയക്കുമരുന്ന് കച്ചവടം; വിപണി ലക്ഷ്യങ്ങളിൽ കേരളവുമെന്നു രഹസ്യാന്വേഷണ വിഭാഗത്തിന്റെ മുന്നറിയിപ്പ്

അഫ്ഗാനിസ്ഥാനിൽ താലിബാൻ ഭരണ൦ പിടിച്ചതോടെ മയക്കുമരുന്ന് കടത്തിലേക്ക് തിരിയുന്ന ഭീകരവാദികളുടെ പ്രധാന ലക്ഷ്യമായി കേരളവുമെന്നു നാർകോട്ടിക് കൺട്രോൾ ബ്യൂറോയുടെയും ഇൻറലിജൻസ് ബ്യൂറോയുടെയും മുന്നറിയിപ്പ്. ഇന്ത്യൻ മഹാസമുദ്രത്തിൽ മയക്കുമരുന്ന് പിടികൂടിയ സംഭവത്തിൽ അഫ്ഗാൻ സംഘമെന്ന് നേരത്തെ കണ്ടെത്തിയിരുന്നു. കേരളത്തിൽ പിടിയിലായ പല മയക്കുമരുന്ന് സംഘങ്ങൾക്കുമുള്ള അഫ്ഗാൻ ബന്ധം വെളിവാകുകയും ചെയ്തിട്ടുണ്ട്.

മീഥെയിൻ ഡയോക്സി മെത്താഫിറ്റാമിൻ എന്ന ലഹരിമരുന്നിന്റെ പ്രധാന അസംസ്കൃത വസ്തുവായ അഫേഡ്ര ലോകത്ത് വൻ തോതിൽ ഉൽപാദിപ്പിക്കുന്നതും, വിവിധ രാജ്യങ്ങളിൽ എത്തിച്ചിരുന്നതും താലിബാനായിരുന്നു. കാബൂളും പിടിച്ചടക്കി അഫ്ഗാൻ സർക്കാരിനെ താഴെയിറക്കി താലിബാൻ ഭീകരവാദികൾ അവിടെ വീണ്ടും ഭരണത്തിലെത്തുമ്പോൾ മയക്കുമരുന്ന് വിൽപ്പന തന്നെയാകും താലിബാൻ വരുമാന മാർഗ്ഗമായി സ്വീകരിക്കുകയെന്നാണ് കരുതുന്നത്. ഇതോടെ കേരളം ഉൾപ്പെടെയുള്ള സ്ഥലങ്ങളിലേക്ക് വൻതോതിൽ മയക്കുമരുന്ന് എത്തിയേക്കുമെന്ന മുന്നറിയിപ്പാണ് ഐബി – എൻസിബി ഏജൻസികൾ നൽകുന്നത്.

ഇന്ത്യൻ മഹാസമുദ്രത്തിൽ മയക്കുമരുന്ന് പിടികൂടിയ സംഭവത്തിൽ ഹാഷിഷ് എത്തിച്ചത് അഫ്ഗാൻ കേന്ദ്രമായ ഹഖാനി നെറ്റ് വർക്കാണെന്നും എൻസിബി കണ്ടെത്തിയിരുന്നു. ഇതിനിടെയാണ് സിന്തറ്റിക് മയക്കുമരുന്നുകളുണ്ടാക്കാനായി കിച്ചൺ ലാബുകൾ വ്യാപകമായി രഹസ്യ കേന്ദ്രങ്ങളിൽ പ്രവർത്തിക്കുന്നുണ്ടെന്ന വിവരവും നാർകോട്ടിക് കൺട്രോൾ ബ്യൂറോയ്‌ക്കും, എക്സൈസ് ഇന്റലിജൻസിനും ലഭിക്കുന്നത്. ഇത് അഫ്ഗാനിൽ നിന്ന് താലിബാൻ കേന്ദ്രങ്ങളെത്തിക്കുന്ന അസംസ്കൃത വസ്തുക്കൾ ഇവിടത്തെ ലാബുകളിൽ അതി മാരക മയക്കുമരുന്നാക്കാനുള്ള സാദ്ധ്യത കൂടിയാണ് നൽകുന്നത്.