ഇൻസ്റ്റഗ്രാമിൽ ഒരു കോടി ഫോളോവേഴ്സായി സന്തോഷം പങ്കിട്ട് ദുൽഖർ സൽമാൻ

മലയാളികളുടെ പ്രിയ നടനാണ് ദുൽഖർ സൽമാൻ. മമ്മൂട്ടിയുടെ മകൻ എന്നതിലുപരി അഭിനയമികവുകൊണ്ടാണ് ദുൽഖർ ആരാധകരുടെ മനസ്സിൽ സ്ഥാനം പിടിച്ചത്. ഇൻസ്റ്റഗ്രാമിൽ ഒരു കോടി ഫോളോവർമാരെ നേടുന്ന ആദ്യ മലയാളിയായി ദുൽഖർ മാറി. ഈ സന്തോഷം ദുൽഖർ ഇൻസ്റ്റഗ്രാം പോസ്റ്റിൽ പങ്കുവച്ചു. ‘എന്റെ ചിന്തകളും പോസ്റ്റുകളും സഹിക്കുന്ന നിങ്ങൾ ഓരോരുത്തരോടും സ്നേഹം’ എന്നാണ് ദുൽഖർ കുറിച്ചിരിക്കുന്നത്.

മലയാളത്തിൽ മാത്രമല്ല, തെന്നിന്ത്യയിൽ തന്നെ ഇൻസ്റ്റഗ്രാം ഫോളോവർമാരുടെ എണ്ണത്തിൽ മുൻ നിരയിലാണ് ദുൽഖർ. 1.73 കോടി ഫോളോവർമാരുള്ള അല്ലു അർജുനാണ് ഒന്നാം സ്ഥാനത്ത്. 1.46 കോടി ഫോളോവർമാരുമായി വിജയ് ദേവരകൊണ്ട രണ്ടാം സ്ഥാനത്ത്. ദുൽഖർ മൂന്നാമനും. ആരാധകരോട് തന്റെ വിശേഷങ്ങൾ പങ്കുവയ്ക്കാനും അവരോട് സംവദിക്കാനുമുള്ള ഇടമായി ദുൽഖർ ഇൻസ്റ്റഗ്രാം ഉപയോഗിക്കാറുണ്ട്.

മലയാളത്തിൽ റോഷൻ ആൻഡ്രൂസ് ചിത്രം ‘സല്യൂട്ടും’ തമിഴിൽ ബ്രിന്ദാ ആദ്യമായി സംവിധാനം ചെയ്യുന്ന ‘ഹേയ് സിനാമിക’യുമാണ് ദുൽഖറിന്റെ ഇനി പുറത്തിറങ്ങാനിരിക്കുന്ന ചിത്രങ്ങൾ. സിനിമയിൽ മുഖം കാണിച്ചിട്ടില്ലെങ്കിലും ദുൽഖറിനൊപ്പമുള്ള ചിത്രങ്ങളിലൂടെയും വീഡിയോയിലൂടെയും ഭാര്യ അമാലും ആരാധകർക്ക് പ്രീയപ്പെട്ടതാണ്. 2011 ഡിസംബർ 21നാണ് ദുൽഖറും അമാലും വിവാഹിതരായത്. ഒരു ആർക്കിടെക്ട് കൂടിയാണ് അമാൽ. 2017 മെയ്‌ മാസം അഞ്ചാം തീയതിയാണ് മറിയം അമീറ ജനിക്കുന്നത്. മറിയം അമീറ സൽമാൻ എന്നാണ് കുട്ടി താരത്തിന് ഇരുവരും നൽകിയ പേര്. കുടുംബത്തിന് ഏറെ പ്രിയപ്പെട്ടവളാണ് മറിയം