ക്വാറന്റൈനിൽ കഴിയുന്നയാൾക്ക് സുഹൃത്ത് കൊടുത്തയച്ച കേക്ക് പൂച്ച കടിച്ചു, കേക്ക് മുറിച്ചുനോക്കിയപ്പോൾ അധികൃതർ ഞെട്ടി

എടപ്പാളിൽ ‌‌നടുവട്ടം ശ്രീവത്സം ആശുപത്രിയിലെ ക്വാറന്റീൻ കേന്ദ്രത്തിൽ കഴിയുന്ന പ്രവാസിക്ക് നൽകാനായി സുഹൃത്ത് കൊടുത്തയച്ച കേക്കിനുള്ളിൽ കണ്ടെത്തിയത് പുകയില ഉൽപ്പന്നങ്ങൾ.ക്വാറന്റൈൻ കേന്ദ്രത്തിൽ ചുമതലയിലുണ്ടായിരുന്ന അധ്യാപകരെയാണ് കേക്ക് ഏൽപിച്ചത്. കേക്ക് പൂച്ച കടിച്ചതോടെയാണ് എല്ലാ കള്ളക്കളികളും വെളിച്ചതായത്.

കേക്കിനൊടൊപ്പമുണ്ടായിരുന്ന ബാക്കി പലഹാരങ്ങൾ നേരത്തെ തന്നെ പ്രവാസിക്ക് കൈമാറിയിരുന്നു. പൂച്ച കടിച്ചതിനാൽ പുതിയ കേക്ക് വാങ്ങി നൽകാമെന്ന് തീരുമാനിച്ചു. കേക്ക് പൂച്ചയ്ക്ക് തന്നെ നൽകാനായി മുറിച്ചപ്പോഴാണ് ഉള്ളിൽ പുകയില ഉൽപന്നങ്ങളുടെ പാക്കറ്റ് കണ്ടെടുത്തത്. സംഭവത്തിൽ യുവാവിനെതിരെ നടപടിയെടുക്കാനുള്ള തീരുമാനത്തിലാണ് അധികൃതർ.

കഴിഞ്ഞ ദിവസം ചങ്ങരംകുളത്തെ ആശുപത്രിയിലെ ക്വാറന്റൈൻ കേന്ദ്രത്തിലും സമാന സംഭവം നടന്നു. ഇവിടെ ക്വാറന്റീനിൽ കഴിയുന്നയാൾക്ക് നൽകാനായി നൽകിയ ബ്രഡിൽ പുകയില ഉൽപന്നങ്ങൾ കണ്ടെത്തി.