എലത്തൂർ ട്രെയിൻ തീവെപ്പ്, തീവ്രവാദ ബന്ധം തള്ളാതെ എന്‍ഐഎ മുന്നോട്ട്, സമഗ്ര അന്വേഷണം – റിപ്പോർട്ട്

തിരുവനന്തപുരം . എലത്തൂർ ട്രെയിൻ തീവെപ്പ് കേസിൽ തീവ്രവാദ ബന്ധം തള്ളാനായിട്ടില്ലെന്ന് എന്‍ഐഎയുടെ റിപ്പോർട്ട്. കേസിൽ സമഗ്രമായ അന്വേഷണം വേണമെന്നും, ആക്രമണത്തിന് ആസൂത്രിത സ്വഭാവമുണ്ടെന്നും എന്‍ഐഎയുടെ പ്രാഥമിക റിപ്പോർട്ടിൽ ഉണ്ട്. പ്രതി ഷാരൂഖ് സെയ്‌ഫി എന്ത് കൊണ്ട് കേരളം തിരഞ്ഞെടുത്തുവെന്ന കാര്യത്തിൽ വലിയ സംശയങ്ങൾ ഉണ്ട് – എൻഐഎ റിപ്പോർട്ടിൽ പറയുന്നു. പ്രാഥമിക റിപ്പോർട്ട് എൻഐഎ കേന്ദ്രത്തിന് കൈമാറി.

ബോഗിയിലെ മുഴുവൻ പേരെയും വധിക്കുകയായിരുന്നു ലക്ഷ്യമെന്നാണ് വിലയിരുത്തേണ്ടത്. ആക്രമണത്തിന് എലത്തൂർ തിരഞ്ഞെടുത്തതിന് പിന്നിലും ദുരൂഹത സംശയിക്കാം – റിപ്പോര്‍ട്ടില്‍ പറഞ്ഞിട്ടുണ്ട്. ഇത്‍ഗിനിടെ കേസുമായി ബന്ധപ്പെട്ട് കൂടൂതൽ പേരെ കേരള പോലീസ് സംഘം ഡൽഹിയിൽ ചോദ്യം ചെയ്‌തു. പ്രതിയുടെ മൊഴിയുടെ അടിസ്ഥാനത്തിൽ കൂടൂതൽ നീക്കങ്ങളിലേക്ക് കടക്കുമെന്നാണ് പുറത്ത് വരുന്ന റിപ്പോർട്ടുകൾ. ബാങ്ക് ഇടപാടുകളും പോലീസ് ശേഖരിക്കുന്നുണ്ട്.

അതേസമയം, പ്രതിക്ക് കൂടുതൽ വൈദ്യ സഹായം നൽകേണ്ടി വരുമെന്നാണ് പോലീസ് പറയുന്നത്. ശാരീരിക അവശതകൾ ഉണ്ടെന്ന് ഷാരൂഖ് ആവർത്തിക്കുന്ന സാഹചര്യത്തിലാണ് നടപടി. പ്രതിയുടെ ആരോഗ്യസ്ഥിതി വിലയിരുത്തിയ ശേഷമാവും തെളിവെടുപ്പ് കാര്യം തീരുമാനിക്കുന്നത്.