ഗുസ്തി താരങ്ങൾ പി.ടി. ഉഷയെ അപമാനിച്ചുവെന്ന തരത്തിൽ വ്യാജവാർത്തകൾ പ്രചരിപ്പിച്ച് കമ്മ്യൂണിസ്റ്റ് നനേതാക്കൾ, നീക്കം ആസൂത്രിതം

കോഴിക്കോട്: ജന്തർ മന്തറിൽ പ്രതിഷേധിക്കുന്ന ഗുസ്തി താരങ്ങളെ കാണാനെത്തിയ ഒളിമ്പിക് അസോസിയേഷൻ പ്രസിഡന്റും രാജ്യസഭാ എംപിയുമായാ പി.ടി. ഉഷയെ താരങ്ങൾ
അപമാനിച്ചുവെന്ന തരത്തിൽ വ്യാജവാർത്തകൾ പ്രചരിപ്പിച്ച് കമ്മ്യൂണിസ്റ്റ് നനേതാക്കൾ. പാർട്ടി നേതാക്കൾ ഉഷയെ കുറ്റപ്പെടുത്തുകയും സമൂഹമാദ്ധ്യമങ്ങളിൽ വ്യാജപ്രചാരണം നടത്തുകയും ചെയ്യുന്നു. കൂടാതെ ഡിവൈഎഫ്ഐ പ്രകടനം നടത്തുകയും ഉഷ സ്‌കൂൾ ഓഫ് അത്ലറ്റിക്സിന് മുന്നിൽ കോലം കത്തിച്ച് പ്രതിഷേധം നടത്തുകയും ചെയ്തു. ഇപ്പോൾ നടക്കുന്നത് വ്യക്തമായ ആസൂത്രണത്തോടുകൂടിയ നീക്കമാണ്.

ഉഷയെ ആരുംതന്നെ എതിർക്കുകയോ തടയുകയോ ചെയ്തിട്ടില്ല. ഗുസ്തി താരങ്ങളുടെ പ്രതിഷേധത്തിൽ കാര്യങ്ങൾ അന്വേഷിക്കുന്നതിനായി എത്തിയ പി.ടി. ഉഷയ്‌ക്ക് ഊഷ്മളമായ സ്വീകരണമായിരുന്നു താരങ്ങൾ നൽകിയത്. സമരക്കാർ ഒറ്റയ്‌ക്കും കൂട്ടായും ഉഷയുമായി സംവദിച്ചു. കാര്യങ്ങളെല്ലാം അന്വേഷിച്ചതിന് ശേഷം വട്ടമിട്ടിരുന്ന് സംസാരിച്ചിട്ടാണ് ഉഷ സമരപ്പന്തലിൽനിന്ന് പിരിഞ്ഞത്. അതുവരെ യാതൊരു രീതിയിലുമുള്ള പ്രശ്നങ്ങൾ അവിടെ ഉണ്ടായില്ല.

സമരപ്പന്തലിൽ നിന്ന് ഇറങ്ങിപ്പോകുമ്പോൾ ഹരിയാനയിലെ റസലിംഗ് ഫെഡറേഷൻ തലവനും കോൺഗ്രസ് നേതാവുമായ ദീപേന്ദർസിങ് ഹൂഡയുടെ അനുയായികൾ ഉണ്ടാക്കിയ തിക്കും തിരക്കും ഒഴിവാക്കി പി.ടി. ഉഷയും ഉദ്യോഗസ്ഥരും കടന്നുപോകുന്നതിന്റെ ദൃശ്യങ്ങളാണ് ചിലർ പ്രചരിപ്പിച്ചുകൊണ്ടിരിക്കുന്നത്. പിന്നാലെ ഇത് കേരളത്തിലെ സഖാക്കൾ തെറ്റിദ്ധരിപ്പിക്കുന്ന തരത്തിൽ പ്രചരിപ്പിച്ച് ഉഷയെ അപമാനിക്കാൻ ശ്രമിക്കുകയുമായിരുന്നു.

പി.ടി. ഉഷയുടെ ജന്തർ മന്തർ സന്ദർശനം കേരളത്തിൽനിന്ന് നേരേ ഡൽഹിയിലത്തിയതിന് ശേഷം സമരക്കാരെ കാണുന്ന വിധത്തിലായിരുന്നു. എന്നാൽ ഇക്കാര്യത്തിൽ മാധ്യമങ്ങളെ അറിയിച്ചിരുന്നില്ല. അതിനാൽ താരങ്ങളുമായി നടന്ന കൂടിക്കാഴ്ചയുടെ ദൃശ്യങ്ങൾ എങ്ങും വന്നില്ല എന്നു മാത്രമല്ല കോൺഗ്രസ് പ്രവർത്തകൻ ഉഷയെ തടയുന്ന ദൃശ്യങ്ങൾ താരങ്ങൾ എതിർക്കുന്നു എന്ന രീതിയിൽ പ്രചരിപ്പിക്കുകയും ചെയ്തു.