പിണറായി സർക്കാരിന്റെ ബജറ്റിനെതിരെ ട്രോളുകളുടെ പെരുമഴ

തിരുവനന്തപുരം . സാധാരണക്കാരന്റെ നട്ടെല്ലൊടിക്കാവുന്ന വിലക്കയറ്റത്തിനു വഴിയൊരുക്കുന്ന കടുത്ത പ്രഖ്യാപനങ്ങളുമായി ധനമന്ത്രി കെ.എൻ.ബാല ഗോപാലിന്റെ ബജറ്റ് പ്രസംഗം കേട്ട് ഞെട്ടിത്തരിച്ചു പോയിരിക്കുകയാണ് കേരളം. സാമൂഹ്യക്ഷേമ പെന്‍ഷന്‍ ചില്ലിക്കാശ് കൂട്ടാതെ വിലക്കയറ്റത്തിനുതകുന്ന തീരുമാനങ്ങളുമായുള്ള ബജറ്റിനെതിരെ പ്രതിപക്ഷം സടകുടഞ്ഞെഴുന്നേ റ്റിരിക്കുകയാണ്.

സാമൂഹ്യക്ഷേമ പദ്ധതികള്‍ മുടക്കമില്ലാതെ കൊണ്ടുപോകാനാണ് നടപടികളെന്നാണ് ധനമന്ത്രി ഇതിനൊക്കെ നൽകുന്ന മറുപടി. സംസ്ഥാന സർക്കാരിന്റെ ബജറ്റിനെതിരെ ട്രോളുകളുടെ പെരുമഴ പെയ്യുകയാണ് സാമൂഹ്യമാധ്യങ്ങളിലാകെ. ബജറ്റിനെതിരായ പ്രതിഷേധം ഫലിത രൂപത്തിൽ സമൂഹമാധ്യമങ്ങളിൽ നിറയുകയാണ്.

‘കരയരുത്, വിമർശിക്കരുത്, ന്യായീകരണ തൊഴിലാളികൾ കരയാൻ പാടില്ല, ഇങ്ങനെ ദുഃഖം കടിച്ചമർത്തി ചിരിച്ചുകൊണ്ട് ന്യായീകരിക്ക്’ എന്ന് പറഞ്ഞ് ജോക്കർ സിനിമയിലെ രംഗങ്ങൾ വരെ കോർത്തിണക്കി വരുകയാണ് ട്രോളുകൾ. ‘എങ്ങനെയുണ്ട് ജനകീയ ബജറ്റ്’ എന്ന് ചോദിക്കുമ്പോൾ ‘മുകുന്ദനുണ്ണി അസോസിയേറ്റ്സ്’ എന്ന സിനിമയിലെ നായിക നൽകിയ പ്രശസ്തമായ മറുപടിയും ട്രോളായി മാറി വെറലായി.