കലിതുള്ളി കാലവർഷം, വ്യാപക നാശനഷ്ടം, കാസര്‍കോട് ജില്ലയിലെ വിദ്യാഭ്യാസ സ്ഥാപനങ്ങള്‍ക്ക് അവധി

കാസര്‍കോട് : തുടക്കത്തിൽ തന്നെ സംസ്ഥാനത്ത് കനത്തനാശനഷ്ടം വിതച്ച് കാലവർഷം. വിവിധ ജില്ലകളിൽ മരം കടപുഴകി വീണ് ഏറെ നേരം ​ഗതാ​ഗതം തടസപ്പെട്ടു. ആലപ്പുഴയിൽ മത്സ്യവിൽപനശാലക്ക് മുകളിൽ തെങ്ങ് കടപുഴകി വീണു. കട പൂർണമായി തകർന്നു. കൊല്ലം പുനലൂർ കുന്നിക്കോട് അബ്ദുൾ സലാമിന്റെ വീടിനു മുകളിലേക്ക് മരം വീണ് വീട് ഭാഗികമായി തകർന്നു. കൊച്ചി പാലാരിവട്ടത്ത് മരം വീണ് രണ്ട് ബൈക്ക് യാത്രികർക്ക് പരിക്കേറ്റു. സമീപത്തെ ഹോട്ടലിന് മുകളിലേക്കാണ് മരം വീണത്. തിരുവല്ല പെരിങ്ങരയിൽ ആൽമരത്തിന്റെ ചില്ല വീണ് രണ്ടു കാറുകൾക്ക് കേടുപാടുകൾ പറ്റി. കൊല്ലത്ത് ട്രാക്കിനു മുകളിലേക്ക് മരം വീണ് ട്രെയിൻ ​ഗതാ​ഗതം തടസപ്പെട്ടു.

കനത്ത മഴ തുടരുന്ന സാഹചര്യത്തില്‍ കാസര്‍കോട് ജില്ലയിലെ വിദ്യാഭ്യാസ സ്ഥാപനങ്ങള്‍ക്ക് കളക്ടര്‍ അവധി പ്രഖ്യാപിച്ചു. ജില്ലയിലെ മിക്ക പ്രദേശങ്ങളിലും അതിശക്തമായ മഴ തുടരുന്നുണ്ട്. ഇന്ന് ഉച്ചയ്‌ക്ക് നൽകിയ മുന്നറിയിപ്പ് പ്രകാരം ജില്ലയിൽ കേന്ദ്ര കാലാവസ്ഥാ വകുപ്പ് റെഡ് അലേർട്ട് പ്രഖ്യാപിച്ചിരിക്കുകയാണ്. നാളെയും അതിശക്തമായ മഴ തുടരുമെന്നാണ് സൂചന.

ആലപ്പുഴയിലെ ചേർത്തല, മാന്നാർ എന്നിവിടങ്ങളിലെ താഴ്ന്ന പ്രദേശങ്ങളിലെ വീടുകൾ വെള്ളത്തിനടിയിലാണ്. ഹരിപ്പാട് കരുവാറ്റയിലും വീടുകളിൽ വെള്ളം കയറി. കോട്ടയത്തും കൊല്ലം കുണ്ടറയിലും കനത്ത മഴയിൽ വീട് ഇടിഞ്ഞുവീണു. ഇടുക്കി ഉടുമ്പൻചോല രാജാക്കണ്ടം വെള്ളിമലയിൽ കനത്ത മഴയിൽ വെള്ളിമല സ്വദേശി വിനുവിന്റെ വീട് തകർന്നു. തിരുവനന്തപുരം മുതലപ്പൊഴിയിൽ മത്സ്യബന്ധന വള്ളം മറിഞ്ഞ് തൊ‍ഴിലാളികൾ കടലിൽ വീണു.

തുടർച്ചയായി മഴ പെയ്താൽ ജില്ലയിലെ കിഴക്കൻ മേഖലയിൽ ഉരുൾപൊട്ടലിന് സാധ്യതയുണ്ടെന്നും മലയോരമേഖലകളിൽ കനത്ത ജാ​ഗ്രത പാലിക്കണമെന്നും നിർദേശമുണ്ട്. എല്ലാ ജില്ലകളിലും കൺട്രോൾ റൂമുകൾ തുറന്നിട്ടുണ്ട്.അതിശക്തമായ മഴ ലഭിക്കുന്ന സാഹചര്യത്തിൽ മണ്ണിടിച്ചിലും മലവെള്ളപ്പാച്ചിലും ഉണ്ടാവാനുള്ള സാധ്യതയുണ്ട്.