മിഷൻ അരിക്കൊമ്പൻ, ദൗത്യം വിജയിപ്പിച്ചവരെ അഭിനന്ദിച്ച് കേരള ഹൈക്കോടതി

കൊച്ചി : ജനവാസമേഖലയിൽ പ്രശ്നങ്ങൾ സൃഷ്ടിച്ചിരുന്ന അരിക്കൊമ്പനെ നാടുകടത്താനുള്ള ദൗത്യം വിജയിപ്പിച്ച സംഘാംഗങ്ങളെ അഭിനന്ദിച്ച് ഹൈക്കോടതി. ജസ്റ്റിസ് എ.കെ ജയശങ്കരൻ നമ്പ്യാർ ദൗത്യസംഘാംഗങ്ങളെ അഭിനന്ദിച്ച് കത്ത് നൽകി. സുരക്ഷിതമായും സഹാനുഭൂതിയോടെയും സംഘാംഗങ്ങൾ ദൗത്യം നിർവ്വഹിച്ചത് മനുഷ്യത്വപരമായ അടയാളമാണെന്നും ദൗത്യസംഘത്തിന് വ്യക്തിപരമായ നന്ദിയും അഭിനന്ദനവും അറിയിക്കുന്നതായും ഹൈക്കോടതി കത്തില്‍ പറയുന്നു.

ചിന്നക്കനാലിലേക്ക് ആന തിരികെ വരാൻ സാധ്യത ഇല്ലേ എന്ന് കോടതി ചോദ്യമുയര്‍ത്തിയിരുന്നു. എന്നാൽ അരിക്കൊമ്പന്റെ സഞ്ചാരം തമിഴ്നാട് മേഖലയിലേക്കാണെന്നായിരുന്നു വനംവകുപ്പിന്റെ മറുപടി.  ആനയെ റേഡിയോ കോളര്‍ വഴി കൃത്യമായി നിരീക്ഷിക്കുന്നുണ്ടെന്നും അധികൃതർ വ്യക്തമാക്കി.
അതേസമയം കഴിഞ്ഞ ദിവസം മുതൽ റേഡിയോ കോളര്‍ വഴിയുള്ള സിഗ്നൽ ലഭിച്ചിരുന്നില്ല.

എന്നാൽ ഇന്ന് രാവിലെയോടെ സിഗ്നൽ വീണ്ടും ലഭിച്ചു തുടങ്ങി. നിലവിൽ തമിഴ്നാട് അതിർത്തിക്കടുത്ത് മുല്ലക്കുടിയിലാണ് അരിക്കൊമ്പനുള്ളതെന്നാണ് ലഭിക്കുന്ന വിവരം. അരിക്കൊമ്പനിൽ ഘടിപ്പിച്ച കോളറിൽ നിന്ന് സിഗ്നൽ നഷ്ടപ്പെട്ടത് ആശങ്കയ്ക്ക് ഇടയാക്കിയിരുന്നു. ജനവാസ മേഖലയിലേക്ക് ആന ഇറങ്ങിയോ എന്ന ആശങ്കയും ഉയർന്നിരുന്നു. എന്നാൽ റേഡിയോ കോളറിൽ നിന്നുള്ള സിഗ്നൽ പുനഃസ്ഥാപിച്ചതോടെ ആശങ്കകൾ ഒഴിഞ്ഞു.