ജനങ്ങൾക്ക് മതിയായ ബോധവൽക്കരണം ലഭിച്ചു: ഫോണിലൂടെയുള്ള കൊവിഡ് ജാഗ്രത നിര്‍ദേശം അവസാനിപ്പിക്കണമെന്ന് മനുഷ്യാവകാശ കമ്മീഷൻ

തിരുവനന്തപുരം: സംസ്ഥാനത്ത് കൊറോണ സാമൂഹ്യവ്യാപനത്തിലേക്ക് എത്തിയതു മുതൽ ലഭിക്കുന്നതാണ് ഫോണിലൂടെയുള്ള കൊറോണ ജാ​ഗ്രത നിർദ്ദേശം. കൊറോണ ജാ​ഗ്രത നിർദ്ദേശം ആദ്യഘട്ടത്തിൽ സമൂഹം ഏറ്റെടുത്തിരുന്നുവെങ്കിലും ഇപ്പോൾ അതൊരു ബാധ്യതയായി മാറി. പലരും ഒന്നടങ്കം ഈ കൊവിഡ് ബോധവൽക്കരണത്തെ പറ്റി വൻ പരാതിയാണ് ഉന്നയിക്കുന്നത്. അവസാനം കേരള ബ്ലൈൻഡ് അസോസിയേഷന് വേണ്ടി സെക്രട്ടറി സംസ്ഥാന മനുഷ്യാവകാശ കമ്മീഷനിലും പരാതി സമർപ്പിച്ചു.

കൊവിഡിനെ പ്രതിരോധിക്കേണ്ട രീതിയെ കുറിച്ച് ജനങ്ങൾക്ക് മതിയായ ബോധവൽക്കരണം ലഭിച്ച സാഹചര്യത്തിൽ ഫോണിലൂടെയുള്ള കൊവിഡ് ബോധവൽക്കരണം അവസാനിപ്പിക്കുന്നത് പരിശോധിക്കണമെന്ന് മനുഷ്യാവകാശ കമ്മീഷൻ ആവശ്യപ്പെട്ടു. ചീഫ് സെക്രട്ടറി ആവശ്യമായ നടപടി സ്വീകരിച്ച് മൂന്നാഴ്ചക്കകം റിപ്പോർട്ട് സമർപ്പിക്കണമെന്ന് കമ്മീഷൻ ജുഡീഷ്യൽ അംഗം പി.മോഹനദാസ് ആവശ്യപ്പെട്ടു. കോൾ വിളിക്കുമ്പോൾ കേൾക്കുന്ന കൊവിഡ് പ്രതിരോധ പ്രചരണം അവസാനിപ്പിക്കണമെന്ന ആവശ്യം സർക്കാർ ഗൗരവപൂർവം പരിശോധിക്കണമെന്നാണ് സംസ്ഥാന മനുഷ്യാവകാശ കമ്മീഷന്റെ നിർദ്ദേശം. കേരള ബ്ലൈൻഡ് അസോസിയേഷന് വേണ്ടി സെക്രട്ടറി സമർപ്പിച്ച പരാതിയിലാണ് നടപടി.

ഫോണിലൂടെയുള്ള ബോധവത്കരണത്തെ കുറിച്ച് സമൂഹത്തിന്റെ വിവിധ ഇടങ്ങളിൽ നിന്ന് ഇപ്പോൾ കനത്ത വിമർശനമാണ് ഉയരുന്നത്. അത്യാവശ്യത്തിന് പൊലീസിൻറെയോ ആരോഗ്യ പ്രവർത്തകരുടെയോ സേവനത്തിനായി ഫോണിൽ വിളിക്കേണ്ടി വരുന്നവരുടെ സമയം കൊല്ലുന്ന ഏർപ്പാടാണ് ഇതെന്ന് പരാതിയിൽ പറയുന്നു.

കഴിഞ്ഞ ഏഴ് മാസമായി കൊവിഡ് വൈറസിനെതിരായ പ്രചാരണം രാജ്യത്തെമ്പാടും നടക്കുന്നതായി പരാതിയിൽ പറയുന്നു. ഇതിന്റെ ഫലമായി കൊവിഡ് പ്രത്യാഘാതത്തെ കുറിച്ച് എല്ലാവർക്കും അറിയാം. ഈ സാഹചര്യത്തിൽ അത്യാവശ്യത്തിന് ഒരാളെ ഫോണിൽ വിളിക്കേണ്ടി വരുമ്പോൾ ഒരു മിനിറ്റിലധികം നീളുന്ന ശബ്ദസന്ദേശത്തിൻറെ ആവശ്യമില്ലെന്ന് പരാതിയിൽ പറയുന്നു. വിഷയം തീർത്തും ഗൗരവകരവും പരിഗണനാർഹവുമാണെന്ന് കമ്മീഷൻ നിരീക്ഷിച്ചു. പരാതി ഉടൻ പരിഹരിക്കാനുള്ള ഉത്തരവാദിത്വം അധികൃതർക്കുണ്ടെന്നും കമ്മീഷൻ ചൂണ്ടിക്കാണിച്ചു.