കത്രിക വയറ്റിലെങ്കിൽ റിപ്പോർട്ട് ഫയലിൽ,ന്യായീകരണ വാദവുമായി ആ​രോ​ഗ്യ​മ​ന്ത്രി

തിരുവനന്തപുരം. കോഴിക്കോട് മെഡിക്കല്‍ കോളജില്‍ അഞ്ചുവര്‍ഷം മുന്‍പ് പ്രസവ ശസ്ത്രക്രിയയ്ക്കിടെ യുവതിയുടെ വയറ്റില്‍ കത്രിക മറന്നുവച്ച് തുന്നിക്കെട്ടിയ സംഭവത്തിൽ കുറ്റാക്കാരായ ഡോക്ടർമാർക്ക് സംരക്ഷണം ഒരുക്കി, അന്വേഷണം വൈകുന്നതിനെ ന്യായീകരണ വാദവുമായി ആരോഗ്യമന്ത്രി.

ആദ്യം അന്വേഷിച്ച സമിതി സമര്‍പ്പിച്ച റിപ്പോര്‍ട്ടില്‍ കൂടുതല്‍ വ്യക്തത വരുത്താന്‍ ശാസ്ത്രീയ അന്വേഷണം നടത്തുകയാണെന്നാണ് മന്ത്രി വീണ ജോര്‍ജിന്റെ വാദം. ഇതിന് അഡീഷണല്‍ ചീഫ് സെക്രട്ടറിയെ ചുമതലപ്പെടുത്തിയെന്നും, മെഡിക്കല്‍ വിദ്യാഭ്യാസ ഡയറക്ടറേറ്റിലെ സ്പെഷല്‍ ഓഫിസറുടെ നേതൃത്വത്തിലുള്ള സംഘമാണ് ആദ്യ റിപ്പോര്‍ട്ട് നല്‍കിയതെന്നുമൊക്കെ ആരോഗ്യമന്ത്രി വാദിക്കുന്നു.

കൂടുതല്‍ അന്വേഷണം വേണമെന്ന് കണ്ടെത്തിയതിനെത്തുടര്‍ന്നാണ് തുടര്‍നടപടിയെന്ന് മന്ത്രി പറഞ്ഞിരിക്കുന്നത്. ശസ്ത്രക്രിയയ്ക്ക് വിധേയയായ സ്ത്രീയുടെ പക്ഷത്തുനിന്നാണ് ഇതുവരെയുള്ള നടപടികള്‍ സ്വീകരിച്ചതെന്നാണ് മന്ത്രി അവകാശപ്പെടുന്നതെങ്കിലും, ശസ്ത്രക്രിയയ്ക്ക് വിധേയയായ സ്ത്രീയുടെ പക്ഷത്തല്ല മന്ത്രിയെന്ന കാര്യമാണ് നടന്ന വസ്തുതകൾ വിളിച്ചു പറയുന്നത്.

പ്രസവ ശസ്ത്രക്രിയയ്ക്കിടെ വയറ്റിൽ കത്രിക കുടുങ്ങിയ കേസില്‍ മാസങ്ങള്‍ കഴിഞ്ഞിട്ടും അന്വേഷണ റിപ്പോർട്ട് ലഭിച്ചില്ലെന്ന് പരാതിക്കാരി കുറ്റപ്പെടുത്തുന്നു. വയറുവേദനയെത്തുടർന്ന് യുവതി മെഡിക്കൽ കോളജിൽ വീണ്ടും ചികിൽസ തേടി. ആരോഗ്യമന്ത്രിയെ അഞ്ച് തവണ വിളിച്ചിട്ടും പ്രതികരണമുണ്ടായില്ല. അന്വേഷണ റിപ്പോർട്ട് ലഭിക്കാതെ ആശുപത്രി വിടില്ലെന്നാണ് അവർ ഇപ്പോൾ പറയുന്നത്. പ്രത്യേക അന്വേഷണ സംഘം യുവതിയുടെ മൊഴി രേഖപ്പെടുത്തിയിട്ട് ഒന്നരമാസമായെങ്കിലും തുടർനടപടികൾ ഒന്നും ഉണ്ടാട്ടില്ല.