ഈ ഉദ്യോഗസ്ഥൻ അടിച്ചത് നിയമവ്യവസ്ഥയുടെ കരണത്ത്, ഇത്തരം പ്രവണത മുളയിലേ നുള്ളണമെന്ന് ജേക്കബ് പുന്നൂസ്

വാഹനപരിശോധനയ്ക്കിടയിൽ കൊല്ലം ആയൂരിൽ വൃദ്ധനെ പോലീസ് ഉദ്യോ​ഗസ്ഥൻ മുഖത്തടിച്ച വിഷയത്തിൽ രൂക്ഷമായി വിമർശിച്ച് മുൻ ഡി.ജി.പി ജേക്കബ് പൂന്നൂസ്. നിയമവ്യവസ്ഥയുടെ കരണത്താണ് ഈ ഉദ്യോഗസ്ഥൻ അടിച്ചത്. വാഹന പരിശോധനക്കിടയിൽ ഇത്തരം വ്യാജ ശൗര്യവും പരാക്രമവും അനാവശ്യവും ക്രൂരവും ആണ്. പൊലീസിന് ചീത്തപ്പേരുണ്ടാക്കാനേ അതുകൊണ്ടു സാധിക്കൂവെന്നും അദ്ദേഹം സാമൂഹ്യമാധ്യമത്തിൽ രേഖപ്പെടുത്തി.

നിരായുധനും ദരിദ്രനുമായ ഒരു വൃദ്ധനോട് ഇങ്ങനെ പെരുമാറുന്നത് അഹങ്കാരം മൂത്ത് നിയമപാലകൻ മനസ്സുകൊണ്ട് നിയമലംഘകൻ ആകുമ്പോഴാണ്. ജനങ്ങൾക്കു പോലീസിലുള്ള വിശ്വാസമാണ് ഇത്തരം പ്രവർത്തികൾ കൊണ്ടു നഷ്ടമാകുന്നത്. ഇതുപോലുള്ള പ്രവണതകൾ മുളയിലേ നുള്ളണം. വൃദ്ധരുടെ കരണത്തടിച്ചല്ല പ്രൊബേഷനിലുള്ളവർ ജോലി പഠിക്കേണ്ടത്. ഇപ്പോഴും ഇത്തരം സംഭവങ്ങൾ ഉണ്ടാകുന്നതിൽ ദുഖിക്കുന്നുവെന്നും അദ്ദേഹം വ്യക്തമാക്കി.

കൊല്ലം ചടയമംഗലത്തിനടുത്ത് ആയൂരിൽ ഹെൽമെറ്റ് ഇല്ലാത്തതിന്റെ പേരിൽ പ്രൊബേഷൻ എസ്.ഐ നജീം വൃദ്ധന്റെ മുഖത്തടിച്ചത്. മഞ്ഞപ്പാറ സ്വദേശി രാമാനന്ദനാണ് മർദ്ദനമേറ്റത്. ക്രൂരമായി മർദ്ദിക്കുകയും ജീപ്പിലേക്ക് വലിച്ചിഴക്കുകയും ചെയ്യുന്നതിന്റെ വീഡിയോ സാമൂഹ്യമാധ്യമങ്ങളിൽ പ്രചരിക്കുന്നുണ്ട്. വ്യാപക പ്രതിഷേധമാണ് പൊലീസ് അതിക്രമത്തിൽ ഉയരുന്നത്.

മുൻ ഡി.ജി.പി ജേക്കബ് പൂന്നൂസിന്റെ കുറിപ്പ്
നിയമവ്യവസ്ഥയുടെ കരണത്താണ് ഈ ഉദ്യോഗസ്ഥൻ അടിച്ചത്. വാഹന പരിശോധനക്കിടയിൽ ഇത്തരം വ്യാജ ശൗര്യവും പരാക്രമവും അനാവശ്യവും ക്രൂരവും ആണ്. പൊലീസിന് ചീത്തപ്പേരുണ്ടാക്കാനേ അതുകൊണ്ടു സാധിക്കൂ. നിരായുധനും ദരിദ്രനുമായ ഒരു വൃദ്ധനോട് ഇങ്ങനെ പെരുമാറുന്നത് അഹങ്കാരം മൂത്ത് നിയമപാലകൻ മനസ്സുകൊണ്ട് നിയമലംഘകൻ ആകുമ്പോഴാണ്. ജനങ്ങൾക്കു പോലീസിലുള്ള വിശ്വാസമാണ് ഇത്തരം പ്രവർത്തികൾ കൊണ്ടു നഷ്ടമാകുന്നത്. ഇതുപോലുള്ള പ്രവണതകൾ മുളയിലേ നുള്ളണം. വൃദ്ധരുടെ കരണത്തടിച്ചല്ല പ്രൊബേഷനിലുള്ളവർ ജോലി പഠിക്കേണ്ടത്. ഇപ്പോഴും ഇത്തരം സംഭവങ്ങൾ ഉണ്ടാകുന്നതിൽ ദുഖിക്കുന്നു..