കോണ്‍ഗ്രസിലെത്തിയ ജഗദീഷ് ഷെട്ടാറിന് വന്‍ തോല്‍വി, ബിജെപി സ്ഥാനാർത്ഥിക്ക് വമ്പൻ വിജയം

ബംഗളൂരു : ബി.ജെ.പി. വിട്ട് കോണ്‍ഗ്രസിലെത്തിയ ജഗദീഷ് ഷെട്ടാർ നേരിട്ടത് വന്‍ തോല്‍വി. മുന്‍ മുഖ്യമന്ത്രിയും സംസ്ഥാനത്തെ മുതിര്‍ന്ന ബി.ജെ.പി. നേതാവുമായിരുന്ന ജഗദീഷ് ഷെട്ടാര്‍ സീറ്റ് ലഭിക്കാതെ വന്നതോടെയാണ് ബി.ജെ.പി. വിട്ട് കോണ്‍ഗ്രസിലെത്തിയത്. എന്നാല്‍ ഹുബ്ബള്ളിധാര്‍വാഡ് സെന്‍ട്രല്‍ മണ്ഡലത്തില്‍ കോണ്‍ഗ്രസ് ടിക്കറ്റില്‍ മത്സരിച്ച ജഗദീഷ് ഷെട്ടാര്‍ ബി.ജെ.പി. സ്ഥാനാര്‍ഥിയായ മഹേഷ് തെങ്കിനക്കൈയോടാണ് തോൽക്കുകയായിരുന്നു.

ബിജെപി സീറ്റ് നിഷേധിച്ചതോടെ പാർട്ടിയുമായ തെറ്റിയ ഷെട്ടാർ അധികം വൈകാതെ കോൺഗ്രസ് അംഗത്വം സ്വീകരിക്കുകയായിരുന്നു. ഹുബ്ബള്ളി-ധാർവാഡ് സെൻട്രലിൽ കോൺഗ്രസ് സ്ഥാനാർത്ഥിയായി ഷെട്ടാറിനെ പ്രഖ്യാപിക്കുകയും ചെയ്തു. ഷെട്ടാറിന്റെ കോൺഗ്രസിലേക്കുള്ള പ്രവേശനം ദക്ഷിണേന്ത്യൻ സംസ്ഥാനത്ത് പാർട്ടിയെ വൻ വിജയത്തിലേക്ക് നയിക്കുമെന്ന് കോൺഗ്രസ് അദ്ധ്യക്ഷൻ മല്ലികാർജുൻ ഖാർഗെ പറഞ്ഞിരുന്നു

എന്നാൽ ഷെട്ടാർ തോൽക്കുമെന്ന് ബിജെപി സംസ്ഥാന നേതൃത്വം മുൻകൂട്ടി പ്രവചിച്ചിരുന്നു. ബിജെപിയിൽ നിന്ന് ഷെട്ടാർ എത്തിയപ്പോൾ വലിയ പ്രതീക്ഷയായിരുന്നു കോൺഗ്രസിന്. ഈ അമിതപ്രതീക്ഷയ്‌ക്കാണ്‌ തിരിച്ചടി കിട്ടിയിരിക്കുന്നത്.