ഇത്രയും പ്രശ്‌നങ്ങൾ ഉണ്ടായിട്ട് മുഖ്യമന്ത്രി ഒരു വാക്ക് ഉരിയാടിയോ, ആർക്കാണ് ആണത്തമുള്ളതെന്ന് കെ സുധാകരൻ

കണ്ണൂര്‍. ആരോപണം ഉയരുമ്പോള്‍ എത് രേഖകള്‍ വേണമെങ്കിലും പരിശോധിക്കാമെന്ന് പറയുന്ന മാത്യു കുഴല്‍നാടനാണോ ആരോപണം ഉയര്‍ന്നാല്‍ വാ തുറക്കാതെ ഇരിക്കുന്ന മുഖ്യമന്ത്രിക്കാണോ ആണത്തമെന്ന് കെപിസിസി പ്രസിഡന്റ് കെ സുധാകരന്‍. മാത്യു കുഴല്‍നാടന്‍ എത്ര അന്തോസോടെയും നട്ടെല്ലോടെയുമാണ് സിപിഎമ്മിനെയും മുഖ്യമന്ത്രിയെയും വെല്ലുവിളിച്ചത്.

സിപിഎമ്മിന്റെ ഏത് നേതാക്കള്‍ക്കും വന്ന് ആരോപണം ഉയര്‍ന്ന രേഖകള്‍ പരിശോധിക്കാം എന്ന് അദ്ദേഹം പറഞ്ഞു. മാത്യു കുഴല്‍നാടന്‍ നടത്തിയ പ്രസ്താവനകള്‍ കേള്‍ക്കുന്നവര്‍ക്ക് അതിലെ സുതാര്യത തിരിച്ചറിയാന്‍ സാധിക്കും. എന്നാല്‍ മുഖ്യമന്ത്രി പിണറായി വിജയന്റെ മകള്‍ക്കെതിരെ ഉയര്‍ന്ന ആരോപണത്തില്‍ അതേ രീതിയില്‍ വെല്ലുവിളിക്കാനുള്ള നട്ടെല്ല് സിപിഎം നേതാക്കള്‍ക്കില്ലെന്നും അദ്ദേഹം പറഞ്ഞു.

കോണ്‍ഗ്രസും മാത്യു കുഴല്‍നാടനും ആ നട്ടെല്ല് കാണിച്ചു. നിങ്ങള്‍ക്ക് ആവശ്യമുള്ള രേഖ പരിശോധിക്കാം തോമസ് ഐസകിനോട് പരിശോധിക്കുവാന്‍ ആവശ്യപ്പെട്ടു. എന്നാല്‍ ആ വെല്ലുവിളി സിപിഎം ഏറ്റെടുക്കുന്നില്ല. ഒരു പരാതിയിലും ഭയമില്ല മാത്യു കുഴന്‍നാടന്റെ കൈവശം എല്ലാ രേഖയും ഉണ്ടെന്നും അദ്ദേഹം പറഞ്ഞു. ഇത്രയും പ്രശ്‌നം ഉണ്ടായിട്ട് ആ മനുഷ്യന്‍ ഒരു വാക്ക് ഉരിയാടിയോ, ആര്‍ക്കാണ് ആണത്തമുള്ളതെന്നും അദ്ദേഹം ചോദിച്ചു.