ഇത് പഴയ കേരളമല്ലെന്ന് മുഖ്യമന്ത്രി ഓര്‍ക്കണമെന്ന് കെ സുരേന്ദ്രന്‍

തിരുവനന്തപുരം:കേന്ദ്ര ഏജന്‍സികളെ അന്വേഷണത്തിന് അനുവദിക്കില്ലെന്നുള‌ളത് മുഖ്യമന്ത്രിയുടെ സ്ഥാനത്തിന് ചേര്‍ന്ന പ്രസ്‌താവനയല്ല. കേന്ദ്ര ഏജന്‍സികളോട് എതിര്‍പ്പുണ്ടെങ്കില്‍ അതറിയിക്കാന്‍ ഭരണഘടനാപരമായ മാര്‍ഗങ്ങളുണ്ട്. അതുചെയ്യാതെ പ്രതിഷേധം സംഘടിപ്പിക്കുന്നതും ഉദ്യോഗസ്ഥരെ ഭീഷണിപ്പെടുത്തുന്നതും സത്യം പുറത്തുവരുമെന്ന ഭയാശങ്കയിലാണെന്ന് കെ.സുരേന്ദ്രന്‍ അഭിപ്രായപ്പെട്ടു.

കേന്ദ്ര ഏജന്‍സികള്‍ സത്യം പുറത്തുകൊണ്ടുവരും എന്ന ഭയാശങ്ക കൊണ്ടാണ് ഇടതുമുന്നണി പ്രതിഷേധം സംഘടിപ്പിക്കുന്നതും ഉദ്യോഗസ്ഥരെ ഭീഷണിപ്പെടുത്തുന്നതുമെന്ന് ബിജെപി സംസ്ഥാന അദ്ധ്യക്ഷന്‍ കെ.സുരേന്ദ്രന്‍. സംസ്ഥാനത്ത് നടക്കുന്ന അഴിമതി കേസുകളില്‍ മുഖ്യമന്ത്രിയുടെയും സര്‍ക്കാരിന്റെയും നിലപാട് രാജ്യത്ത് ഇതുവരെ കേട്ടുകേള്‍വിയില്ലാത്തതാണ്.

അന്വേഷണ സംഘത്തെ ഭീഷണിപ്പെടുത്തി ഓടിക്കാമെന്ന ധാരണ കേരളത്തില്‍ നടക്കില്ല. ഇത് പഴയ കേരളമല്ലെന്ന് മുഖ്യമന്ത്രിയെ ഓര്‍മ്മിപ്പിക്കുകയാണെന്ന് കെ.സുരേന്ദ്രന്‍ പറഞ്ഞു. കേന്ദ്ര ഏജന്‍സികളെ ഭീഷണിപ്പെടുത്തി വരുതിയിലാക്കാമെന്നത് മുഖ്യമന്ത്രിയുടെ വ്യാമോഹമാണ്. മടിയില്‍ കനമില്ലെങ്കില്‍ മുഖ്യമന്ത്രി എന്തിനാണ് അന്വേഷണത്തെ ഭയക്കുന്നത്. മുഖ്യമന്ത്രിയുടെത് കുറ്റവാളികളെ സംരക്ഷിക്കാനും സ്വയം രക്ഷപെടാനുമുള‌ള വ്യഗ്രതയുമാണെന്ന് കെ.സുരേന്ദ്രന്‍ ആരോപിച്ചു. അന്വേഷണം നേരിടുന്നതിന് പകരം ഭീഷണിയും അക്രമവും കാണിച്ച്‌ അന്വേഷണ സംഘത്തെ അട്ടിമറിക്കാന്‍ ശ്രമിക്കുന്നതെന്തിനെന്ന് മുഖ്യമന്ത്രി വ്യക്തമാക്കണമെന്നും കെ.സുരേന്ദ്രന്‍ അഭിപ്രായപ്പെട്ടു.