മാണ്ഡിയില്‍ ബിജെപി നേതാക്കളുമായി കൂടിക്കാഴ്ച നടത്തി കങ്കണ

ലോക്സഭാ തെരഞ്ഞെടുപ്പില്‍ മത്സരിക്കാനുള്ള അവസരം തനിക്ക് നല്‍കിയ പ്രധാനമന്ത്രി നരേന്ദ്രമോദിക്കും ബിജെപി അദ്ധ്യക്ഷൻ ജെ.പി. നദ്ദയ്‌ക്കും അനുരാഗ് ഠാക്കൂർ എംപിക്കും ഹൃദയം നിറഞ്ഞ നന്ദി അറിയിച്ച് കങ്കണ. മാണ്ഡി ജില്ലാ യൂണിറ്റിനൊപ്പം ഹോളി ആഘോഷിച്ച കങ്കണ ഏറെ വൈകാരികമായ ദിനമാണിന്നെന്നും പ്രതികരിച്ചു.

രാവിലെ മാണ്ഡിയിലെത്തിയ കങ്കണ ബിജെപി പ്രാദേശിക നേതാക്കളുമായി കൂടിക്കാഴ്ച നടത്തി. ഹോളിയുടെ ഭാഗമായി നേതാക്കള്‍ക്ക് നിറങ്ങള്‍ കൊണ്ട് തിലകം ചാർത്തിയ കങ്കണ, ജയ് ശ്രീറാം വിളികളോടെയാണ് സ്ഥാനാർത്ഥിത്വത്തെ സ്വീകരിച്ചത്.

“എല്ലാവർക്കും ഹോളി ആശംസകള്‍, ഇതെന്റെ ജന്മഭൂമിയാണ്. ഇവിടെ സ്ഥാനാർത്ഥിയാകാൻ എന്നെ തിരഞ്ഞെടുത്തുവെന്നത് വലിയ ഭാഗ്യമായി കണക്കാക്കുന്നു. ഹോളിയുടെ ഈയവസരത്തില്‍ വന്നുചേർന്ന ഈ സൗഭാഗ്യത്തെ ഞാനും എന്റെ കുടുംബാംഗങ്ങളും ഏറെ വൈകാരികമായാണ് കണക്കാക്കുന്നത്. എല്ലാവിധ പിന്തുണയും നല്‍കിയ ബിജെപി അദ്ധ്യക്ഷൻ നദ്ദയ്‌ക്കും കേന്ദ്രമന്ത്രി അനുരാഗ് ഠാക്കൂറിനും ഹിമാചല്‍ മുൻ മുഖ്യമന്ത്രി ജയ്റാം ഠാക്കൂറിനും ഒരുപാട് നന്ദിയുണ്ട്. പാർലമെന്റിലേക്ക് തിരഞ്ഞെടുക്കപ്പെട്ടാല്‍ ഹിമാചലിലെ ജനങ്ങള്‍ക്ക് വേണ്ടി പ്രത്യേകിച്ച്‌ മാണ്ഡിയിലുള്ളവർക്ക് ഏതുസാഹചര്യത്തിലും എപ്പോള്‍ വേണമെങ്കിലും എന്നെ സമീപിക്കാം.

പാർട്ടിയെ സംബന്ധിച്ചിടത്തോളം ഞാൻ പുതിയ കാര്യകർ‌ത്താവാണ്. പാർട്ടി പറയുന്നതെന്തായാലും അത് അനുസരിക്കുകയെന്നതാണ് എന്റെ കർത്തവ്യം. ബിജെപിയുടെ വിജയം എന്റേത് കൂടിയാണ്. പ്രധാനമന്ത്രി നരേന്ദ്രമോദി വിജയിക്കുമ്ബോള്‍ ഞങ്ങളും വിജയിക്കുന്നു. ഞാനൊരു സൂപ്പർസ്റ്റാറാണെന്നോ വലിയ താരമാണെന്നോ കരുതുന്നില്ല. താരപരിവേഷങ്ങളെല്ലാം ഇവിടെ ത്യജിച്ചിരിക്കുകയാണ്. പാർട്ടി നല്‍കുന്ന നിർദേശങ്ങള്‍ പാലിക്കുന്ന എളിയ കാര്യകർത്താവായിരിക്കും ഇനി ഞാൻ.

ലോകത്തിലെ തന്നെ ഏറ്റവും ജനപ്രീതി നേടിയ നേതാക്കളിലൊരാളാണ് പ്രധാനമന്ത്രി നരേന്ദ്രമോദി. അദ്ദേഹത്തിന്റെ പാതയാണ് ഞങ്ങള്‍ പിന്തുടരുന്നത്. മോദിയുടെ അജണ്ട ഞങ്ങളുടേതുമാണ്. അദ്ദേഹത്തിന്റെ സേനയായി ഞങ്ങളുണ്ടാകും. പ്രധാനമന്ത്രി നരേന്ദ്രമോദിയുടെ പ്രവർത്തനങ്ങളാണ് ഞങ്ങളോരോരുത്തരെയും വിജയത്തിലേക്ക് എത്തിക്കുന്നത്. – കങ്കണ പ്രതികരിച്ചു.

‌