കണ്ണൂരിൽ വയോധികയെ കെട്ടിയിട്ട് വീട്ടിൽ കവർച്ച, മുഖം മൂടി ധരിച്ചെത്തിയ നാലംഗ സംഘം 10 പവൻ കവർന്നു

കണ്ണൂർ : രാത്രിയിൽ വീട്ടിൽ അതിക്രമിച്ചു കയറിയ നാലംഗ സംഘം വയോധികയെ കെട്ടിയിട്ട് സ്വർണം കവർന്നു. കണ്ണൂർ പരിയാരത്ത് ഇന്നലെ രാത്രിയോടെയാണ് സംഭവം. മുഖം മൂടി ധരിച്ചെത്തിയ നാലംഗ സംഘമാണ് വയോധികയെ കെട്ടിയിട്ട് 10 പവൻ സ്വർണം കവർന്നത്. അമ്മാനപ്പാറയിൽ ഡോക്ടർ ഷക്കീറിന്റെ വീട്ടിലാണ് കവർച്ച നടന്നത്.

രാത്രി 11 മണിയോടെ ഡോക്ടർ ഷക്കീറും ഭാര്യയും പുറത്ത് പോയ സമയത്താണ് മോഷ്ടാക്കൾ വീടിന്റെ ജനൽ കമ്പി പൊട്ടിച്ച് അകത്ത് കയറിയത്. വീട്ടിൽ ബന്ധുവായ വയോധികയും രണ്ട് കുട്ടികളുമാണ് ഉണ്ടായിരുന്നത്. കുട്ടികൾ രണ്ടുപേരും മുകളിലെ നിലയിലെ മുറികളിലായിരുന്നു. പുലർച്ചെ കുട്ടികൾ താഴേക്ക് വന്നപ്പോളാണ് കവർച്ച നടന്നതായി മനസിലായത്.

വയോധികയെ കെട്ടിയിട്ട് മുഖത്ത് പ്ലാസ്റ്റർ ഒട്ടിച്ച നിലയിൽ ആയിരുന്നു ഉണ്ടായിരുന്നത്. വീട്ടിലുണ്ടായിരുന്ന സ്വർണവും വയോധികയുടെ ശരീരത്തിലുണ്ടായിരുന്ന സ്വർണവും മോഷ്ടാക്കൾ കവർന്നിട്ടുണ്ട്. സംഭവത്തിൽ പോലീസ് കേസെടുത്ത് അന്വേഷണം തുടങ്ങി.