അബി​ഗേലിനെ തട്ടിക്കൊണ്ടുപോയി താമസിപ്പിച്ച ഒറ്റനിലയുള്ള വീട് കൊല്ലം ജില്ലയിൽ തന്നെയെന്ന സംശയത്തിൽ പൊലീസ്

കൊല്ലം∙ ആറുവയസുകാരിയെ തട്ടിക്കൊണ്ടുപോയി താമസിപ്പിച്ച വീട് കൊല്ലം ജില്ലയിൽ തന്നെയെന്ന സംശയത്തിൽ പൊലീസ്. തട്ടിക്കൊണ്ടു പോയവരും സമീപ പ്രദേശങ്ങളിൽ ഉള്ളവർ തന്നെയെന്ന രീതിയിലും അന്വേഷണം പുരോ​ഗമിക്കുന്നുണ്ട്. വർക്കല കല്ലുവാതുക്കൽ ഭാ​ഗങ്ങളിൽവെച്ച് കാർ കടന്നുപോകുന്ന സിസിടിവി ദൃശ്യങ്ങളും ശേഖരിച്ച് അന്വേഷണം നടക്കുന്നുണ്ട്. കുട്ടിയെ ബലമായി കാറിലേക്ക് പിടിച്ചുകയറ്റി സംഘം ആദ്യം വർക്കല ഭാ​ഗത്തേക്കാണ് കടന്നതെന്ന സൂചനും പൊലീസിന് ലഭിച്ചിട്ടുണ്ട്.

അബിഗേൽ നൽകുന്ന വിവരങ്ങൾ അനുസരിച്ച് സംശയമുള്ള മുപ്പതോളം സ്ത്രീകളുടെ ചിത്രങ്ങൾ പൊലീസ് കാണിച്ചെങ്കിലും കുട്ടിക്ക ആരേയും തിരിച്ചറിയാനായില്ല. കൂടുതൽ രേഖാചിത്രം തയാറാക്കാനുള്ള ശ്രമത്തിലാണ് പൊലീസ്.തട്ടിയെടുത്തതിനു പിന്നാലെ അബിഗേലിനു മയങ്ങാൻ മരുന്നു നൽകിയെന്ന സംശയത്തെ തുടർന്ന് കുട്ടിയുടെ രക്തവും മൂത്രവും പൊലീസ് രാസപരിശോധനയ്ക്ക് അയച്ചു.

നിലവിൽ കൊല്ലം വിക്ടോറിയ ആശുപത്രിയിൽ ചികിത്സയിൽ കഴിയുന്ന കുട്ടിയെ ഇന്നു വൈകിട്ടോടെ വീട്ടിലേക്ക് അയയ്ക്കാനാണ് തീരുമാനം. കുട്ടിയുടെ പിതാവും മാതാവും ആശുപത്രിയിൽ ഒപ്പമുണ്ട്.