അമിതവേഗത്തെക്കുറിച്ച് പരാതിപ്പെട്ട യാത്രക്കാരോട് ബസിൽ നിന്ന് ഇറങ്ങിപ്പോകാൻ ആവശ്യപ്പെട്ട് ഡ്രൈവർ, ബസ് കസ്റ്റഡിയിലെടുത്തു

മലപ്പുറം. ചേളാരിക്ക് സമീപം പടിക്കലിൽ അമിതവേഗത്തെക്കുറിച്ച് പരാതിപ്പെട്ട യാത്രക്കാരോട് ഇറങ്ങിപ്പോകാൻ ആവശ്യപ്പെട്ട് ബസ് ഡ്രൈവർ.കോഴിക്കോട് നിന്ന് തൃശൂരിലേക്ക് പോകുകയായിരുന്ന ബ്ലൂറേ ലിമിറ്റഡ് സ്റ്റോപ്പ് ബസിൽ ആയിരുന്നു സംഭവം.

ബസിന്‌ വേഗത കൂടുതലാണെന്നും വേഗം കുറയ്ക്കണമെന്നുമാണ് ഡോക്ടർമാരായ യാത്രക്കാർ ആവശ്യപ്പെട്ടത്. ഇതോടെയാണ് ‘പേടിയാണെങ്കിൽ ഇറങ്ങി പൊയ്ക്കോ’ എന്ന മറുപടി ബസ് ജീവനക്കാർ നൽകിയത്. ഇതേത്തുടർന്ന് സ്ത്രീകൾ ഉൾപ്പടെയുള്ള യാത്രക്കാർ ബസിൽനിന്ന് ഇറങ്ങി കെഎസ്ആർടിസി ബസിൽ യാത്ര തുടർന്നു. ബസിൽനിന്ന് ഇറങ്ങിയ യാത്രക്കാർ മോട്ടോര്‍ വാഹന വകുപ്പ് ഉദ്യോഗസ്ഥരെ വിവരമറിയിച്ചു.

ഇതേ തുടർന്ന് നടത്തിയ പരിശോധനയില്‍ എ.എം.വി.ഐമാരായ വി. വിജീഷ്, പി. ബോണി എന്നിവരുടെ നേതൃത്വത്തില്‍ ചങ്കുവെട്ടിയില്‍വെച്ച് ഇതേ ബസ് തടഞ്ഞുനിർത്തി കസ്റ്റഡിയിലെടുത്തു. അമിതവേഗതക്കും അശ്രദ്ധമായി വാഹനം ഓടിച്ചതിനും ഡ്രൈവര്‍ക്കെതിരെ കേസെടുത്തു. ഇയാളുടെ ലൈസൻസ് സസ്‌പെൻഡ് ചെയ്യാൻ ജില്ലാ ആര്‍.ടി.ഒ.യ്ക്ക് ശുപാര്‍ശയും നല്‍കി.

ബസിൽ കയറിയതുമുതൽ അമിതവേഗത്തിലും അപകടകരമായ രീതിയിലുമാണ് ഡ്രൈവർ ഓടിച്ചതെന്ന് പരാതിക്കാർ പറയുന്നു. അപകടകരമായ രീതിയിൽ ഓവർ ടേക്ക് നടത്തുകയും ചെയ്തു. ദേശീയപാത നിർമാണ ജോലികൾ നടക്കുന്നതിനാൽ പല സ്ഥലങ്ങളിലും റോഡിന് വീതി വളരെ കുറവാണ്. എന്നാൽ ഇത് കണക്കിലെടുക്കാതെയാണ് അപകടകരമായ രീതിയിൽ ബസ് ഓടിച്ചിരുന്നതെന്നും പരാതിക്കാർ പറയുന്നു.

പലതവണ ബസിന് വേഗം കുറയ്ക്കണമെന്ന് സ്ത്രീകൾ ഉൾപ്പടെയുള്ള യാത്രക്കാർ ആവശ്യപ്പെട്ടെങ്കിലും ഡ്രൈവർ അത് ചെവിക്കൊള്ളാൻ തയ്യാറായില്ല. ബസിന്‍റെ റണ്ണിങ് ടൈം കുറവാണെന്നും, പേടിയുള്ളവർ ബസിൽനിന്ന് ഇറങ്ങാനുമാണ് ഡ്രൈവർ ആവശ്യപ്പെട്ടത്.