കോവിഡിനെ തോല്‍പ്പിച്ച മലയാളി ഡോക്ടര്‍ ഫാമിലി, രോഗത്തെ തുരത്തിയവരില്‍ പിഞ്ച് കുഞ്ഞുങ്ങളും പ്രായമായ സ്ത്രീയും

പാലക്കാട്: ലോകം മുഴുവന്‍ കോവിഡ് എന്ന മഹാമാരിക്ക് എതിരെ പോരാടുകയാണ്. ആരോഗ്യ പ്രവര്‍ത്തകര്‍ തന്നെയാണ് കൊറോണ കാലത്തെ യഥാര്‍ഥ ഹീറോകള്‍. പാലക്കാട്ടെ ഒരു ഡോക്ടര്‍ കുടുംബം മുഴുവന്‍ കോവിഡിനെ പൊരുതി തോല്‍പ്പിച്ചിരിക്കുകയാണ്. ഈറോഡ് റെയില്‍വേ ആശുപത്രിയിലെ ഡോ. ഡോണ ജോര്‍ജിനും ഭര്‍ത്താവ് പാലക്കാട് ജില്ലാ ആശുപത്രിയിലെ അസിസ്റ്റന്റ് സര്‍ജന്‍ ഡോ. ബിനോ പോള്‍ സെബാസ്റ്റ്യനും കോവിഡ് പിടിമുറുക്കിയിരുന്നു. ഇവരുടെ രണ്ടര വയസും 11 മാസം പ്രായവുമുള്ള ആണ്‍മക്കള്‍ക്കും കോവിഡ് പിടിപെട്ടു. എന്നാല്‍ അവിടെയും അവസാനിച്ചില്ല. ഡോണയുടെ അമ്മയ്ക്കും വീട്ടില്‍ സഹായത്തിനായി എത്തിയ സ്ത്രീയ്ക്കും കോവിഡ് ബാധിച്ചു.

ഡോ. ബിനോ മാര്‍ച്ച് 20ന് ആയിരുന്നു ചങ്ങനാശേരിയില്‍ നിന്നും ഡോണ ജോലി ചെയ്യുന്ന ഈ റോഡിലേക്ക് പോയത്. ഇതിനിടെയാണ് ഈ റോഡ് പ്രദേശത്ത് ഉള്‍പ്പെടെ വൈറസ് പടര്‍ന്ന് പിടിച്ചത്. ഇതോടെ വൈറസിനെതിരെയുള്ള പോരാട്ടത്തില്‍ ഡോണ മുന്‍പന്തിയില്‍ തന്നെ ഉണ്ടായിരുന്നു. 25-ാം തീയതി ഡോണയ്ക്ക് കോവിഡ് സ്ഥിരീകരിച്ചു. തുടര്‍ന്ന് കോയമ്പത്തൂരിലെ ഇഎസ്‌ഐ ആശുപത്രിയില്‍ പ്രവേശിപ്പിച്ചു.

തുടര്‍ന്ന് കുടുംബാംഗങ്ങള്‍ക്ക് കോവിഡ് പരിശോധന നടത്തി. ആദ്യ പരിശോധനയില്‍ ഡോണയുടെ അമ്മയ്ക്കും 11 മാസം പ്രായമുള്ള ഇളയ കുഞ്ഞിനും രോഗം സ്ഥിരീകരിച്ചു. രണ്ടാം പരിശോധനയില്‍ ബിനോയ്ക്കും രോഗം ബാധിച്ചിട്ടുണ്ടെന്ന് സ്ഥിരീകരിച്ചു. ഇതിനിടെ മൂത്ത മകനും രോഗം സ്ഥിരീകരിച്ചു. ഡോണയ്ക്ക് ഈ റോഡിലെ ആശുപത്രിയില്‍ നിന്നും പോത്തനൂര്‍ ആശുപത്രിയിലേക്ക് സ്ഥലംമാറ്റം ലഭിച്ചിരുന്നു. പക്ഷേ, കോയമ്പത്തൂരിലെ ആശുപത്രിയില്‍ കുടുംബം ചികിത്സയില്‍ ആയിരുന്നു. ചികിത്സയുടെ ആദ്യ ദിവസങ്ങളില്‍ പല മുറികളില്‍ ആയിരുന്നു. പിന്നീട് കുടുംബത്തെ ഒരുമിച്ചാക്കി. രോഗം ഭേദമായ ശേഷം ഒരു മാസം വീട്ടില്‍ ക്വാറന്റീനില്‍ കഴിഞ്ഞു.

നിരീക്ഷണ കാലാവധി അവസാനിച്ചതോടെ ബിനോ പാലക്കാട് ജില്ലാ ആശുപത്രിയില്‍ ജോലിയില്‍ തിരികെ പ്രവേശിച്ചു. ഡോണ പോത്തന്നൂര്‍ റെയില്‍വെ ആശുപത്രിയിലും സേവനം ആരംഭിച്ചു. ലോക്ക് ഡൗണ്‍ മൂവം സംസ്ഥാനാന്തര യാത്ര പാടില്ലാത്തതിനെ തുടര്‍ന്ന് ഡോണയും ബിനോയും രണ്ടിടത്താണ്. അമ്മയും മക്കളും ഡോണയ്ക്ക് ഒപ്പമാണ്.