45 ലിറ്റർ വിദേശ മദ്യവുമായി ഒരാൾ പിടിയിൽ, സംഭവം കാസർകോട്

കാസർകോട് : കാസർകോട് രാജപുരത്ത് 45 ലിറ്റർ വിദേശ മദ്യവുമായി ഒരാൾ പിടിയിൽ. രാജപുരം മാലക്കല്ല് സ്വദേശി സനീഷ് സൈമൺ (37) ആണ് പിടിയിലായത്. പൊലീസ് ഉദ്യോ​ഗസ്ഥർ നടത്തിയ അന്വേഷണത്തിലാണ് പ്രതിയെ പിടികൂടിയത്.

പോലീസ് എത്തിയപ്പോൾ പ്രതിയുടെ വീടിന് മുൻവശം നിർത്തിയിട്ടിരുന്ന പ്രതിയുടെ കാറിലും ബൈക്കിലും നിന്നുമാണ് മദ്യം കണ്ടെത്തിയത്. പൊലീസിന് ലഭിച്ച രഹസ്യ വിവരത്തിന്റെ അടിസ്ഥാനത്തിലായിരുന്നു പരിശോധന നടന്നത്. തുടർന്ന് പ്രതിയുടെ വീടിന് സമീപത്തെത്തിയ ഉദ്യോ​ഗസ്ഥർ വീട് വളയുകയും സനീഷിനെ പിടികൂടുകയുമായിരുന്നു.

അതേസമയം, പത്തനംതിട്ടയിൽ ബാഗിൽ വടിവാളും എയർഗണ്ണുമായി ഭാര്യവീട്ടിൽ അതിക്രമിച്ച് കയറിയ മരുമകന്റെ കുത്തേറ്റ് വീട്ടമ്മക്ക് ഗുരുതര പരിക്ക്. പന്തളത്ത് ദിവസം വൈകിട്ട് ആറ് മണിയോടെയായിരുന്നു സംഭവം. തോന്നല്ലൂർ സ്വദേശി സീനയ്‌ക്കാണ്(46) കുത്തേറ്റത്. സീനയുടെ നെഞ്ചിലും വയറിലുമായി മൂന്നിടത്ത് കുത്തേറ്റിട്ടുണ്ട്.

ഇളയ മകളുടെ ഭർത്താവ് ഷമീർ ഖാൻ (36)ആണ് സീനയെ കുത്തിയത്. വീട്ടമ്മയെ പരുമലയിലെ സ്വകാര്യ ആശുപത്രിയിൽ പ്രവേശിപ്പിച്ചിരിക്കുകയാണ്. സീനയുടെ മകൾ വിവാഹബന്ധം വേർപ്പെടുത്താനിരിക്കെയാണ് സർവേയറായ ഷമീർ ഭാര്യ വീട്ടിൽ എത്തിയത്. ഇവർ തമ്മിൽ വലിയ വാക്ക് തർക്കവും ഉണ്ടായിരുന്നു.

തുടർന്നാണ് പ്രതി സീനയെ കുത്തിയത്. ഇയാളെ അഞ്ചൽ പോലീസ് കസ്റ്റഡിയിലെടുത്തു. ഷമീറിന്റെ കൈവശമുണ്ടായിരുന്ന ബാഗിൽ നിന്നും വടിവാളും എയർഗണ്ണും പോലീസ് കണ്ടെത്തിയിട്ടുണ്ട്. വകവരുത്തണമെന്ന കൃത്യമായ ആസൂത്രണത്തോടെയാണ് പ്രതി ഭാര്യവീട്ടിൽ എത്തിയത്.