അമ്മയുടെ മൃതദേഹത്തിന് മുന്നില്‍ ഗേറ്റ് താഴിട്ട് പൂട്ടി മകന്‍, പോലീസ് എത്തി പൂട്ട് മുറിച്ചുമാറ്റി

പൂച്ചാക്കല്‍: ജീവിതം മുഴുവന്‍ മക്കള്‍ക്കായി ജീവിച്ച് ഒടുവില്‍ ആ മക്കള്‍ തന്നെ മാതാപിതാക്കളെ തള്ളി പറയുകയും ഒഴിവാക്കുകയും ഉപേക്ഷിക്കുകയും ചെയ്യുന്ന പല സംഭവങ്ങളുമുണ്ട്. ഇപ്പോള്‍ മരണപ്പെട്ടിട്ട് പോലും അമ്മയുടെ മൃതദേഹത്തോട് മകന്‍ ചെയ്താണ് ഏവരെയും ഞെട്ടിക്കുന്നത്. അമ്മയുടെ മൃതദേഹം തന്റെ സ്ഥലത്തുകൂടി കൊണ്ടുപോകാതിരിക്കാന്‍ വേണ്ടി മകന്‍ ഗേറ്റ് പൂട്ടിയിട്ടു. ഒടുവില്‍ പോലീസ് എത്തി പൂട്ട് മുറിച്ചുമാറ്റി കുടുംബ വീടിനു സമീപത്തുള്ള മകളുടെ വീട്ടില്‍ അമ്മയുടെ സംസ്‌കാരം നടത്തുകയായിരുന്നു.

പൂച്ചാക്കല്‍ ചേന്നംപള്ളിപ്പുറം പഞ്ചായത്ത് എട്ടാം വാര്‍ഡിലാണ് സംഭവമുണ്ടായത്. ബുധനാഴ്ച രാത്രിയോടെയാണ് കോവിഡ് ബാധിച്ച് ആലപ്പുഴ മെഡിക്കല്‍ കോളജ് ആശുപത്രിയില്‍ വെച്ച് വൃദ്ധ മരിക്കുന്നത്. മൃതദേഹം സംസ്‌കരിക്കാനായി മകന്‍ താമസിക്കുന്ന കുടുംബ വീട്ടിലൂടെ അമ്മ താമസിച്ചിരുന്ന മകളുടെ വീട്ടിലേക്ക് കൊണ്ടുപോകാന്‍ ശ്രമിച്ചു. ഈ ഒരു വഴി മാത്രമാണ് മകളുടെ വീട്ടിലേക്ക് ഉണ്ടായിരുന്നത്. എന്നാല്‍ മകന്‍ കുടുംബ വീടിന്റെ ഗേറ്റ് അടച്ചു. സ്വത്ത് തര്‍ക്കം നിലനിന്നതിനാലാണ് മൃതദേഹം കൊണ്ടുപോകുന്നത് മകന്‍ തടഞ്ഞത്.

ഇന്നലെ ഉച്ചയോടെയാണ് മൃതദേഹം ജനപ്രതിനിധികളുടെ സാന്നിധ്യത്തില്‍ മെഡി. കോളജ് ആശുപത്രിയില്‍നിന്ന് ഏറ്റുവാങ്ങി മകളുടെ വീട്ടിലേക്കു കൊണ്ടുവന്നത്. കുടുംബവീട്ടിലൂടെ മൃതദേഹവുമായെത്തിയപ്പോള്‍, ഇതിലെ കൊണ്ടുപോകാന്‍ പറ്റില്ലെന്ന് മകന്‍ പറയുകയും ഗേറ്റ് താഴിട്ട് പൂട്ടുകയും ചെയ്യുകയായിരുന്നു. പഞ്ചായത്ത് പ്രസിഡന്റ് ഉള്‍പ്പെടെയുള്ളവര്‍ ഗേറ്റ് തുറക്കാന്‍ ആവശ്യപ്പെട്ടിട്ടും ഇയാള്‍ വഴങ്ങിയില്ല. ഒടുവില്‍ പോലീസില്‍ വിവരം അറിയിക്കുകയും ചേര്‍ത്തലയില്‍ നിന്നും പോലീസ് എത്തി ഗേറ്റ് തുറക്കാന്‍ ആവശ്യപ്പെട്ടു. എന്നിട്ടും മകന്‍ തയ്യാറായില്ല. ഒടുവില്‍ പോലീസിന്റെ നതൃത്വത്തില്‍ ഗേറ്റിന്റെ പൂട്ട് പൊളിച്ച് മൃതദേഹം മകളുടെ വീട്ടില്‍ എത്തിച്ച് സംസ്‌കാരം നടത്തുകയായിരുന്നു.