പൊതുചടങ്ങുകളിൽ ഈശ്വര പ്രാർഥന ഒഴിവാക്കണമെന്ന് പി വി അൻവർ എംഎൽഎ

മഞ്ചേരി . പൊതുചടങ്ങുകളിൽ ഈശ്വര പ്രാർഥന ഒഴിവാക്കണമെന്ന വിവാദപരമായ ആവശ്യവുമായി പി വി അൻവർ എംഎൽഎ രംഗത്ത്. ഇക്കാര്യത്തിൽ സർക്കാർ നയപരമായ തീരുമാനമെടുക്കണമെന്നാണ് തന്റെ വിശ്വാസികളോടുള്ള വിരുദ്ധത പച്ചയായി തുറന്നു കാട്ടി അൻവർ ആവശ്യപ്പെട്ടിരിക്കുന്നത്. അൻവറിന്റെ പരാമർശം വിശ്വാസികൾക്ക് പ്രത്യേകിച്ച് ഹൈന്ദവ വിശ്വാസികൾക്കെ തിരാണെന്നാണ് വിലയിരുത്തുന്നത്.

മഞ്ചേരി പട്ടയമേളയിലാണ് പി വി അൻവർ ഇക്കാര്യം പറഞ്ഞിട്ടുള്ളത്. ദൈവ വിശ്വാസം ഓരോരുത്തരുടെയും മനസ്സിലാണ്. വിശ്വസികളല്ലാത്തവരും വേദിയിലുണ്ട്. പ്രാർഥനാ സമയം കാലിന് സുഖമില്ലാത്ത ഒരാൾ മറ്റൊരാളുടെ സഹായത്തോടെയാണ് എഴുന്നേറ്റു നിന്നത്. അതുകൊണ്ടുതന്നെ പ്രാർഥന പോലുള്ള കാര്യങ്ങൾ പൊതുചടങ്ങിൽ നിന്ന് ഒഴിവാക്കിക്കൂടെ? അൻവർ ചോദിച്ചു.. മന്ത്രിമാരായ കെ രാജൻ, വി അബ്ദുറഹ്മാൻ എന്നിവർ വേദിയിലിരിക്കെയായിരുന്നു പി വി അൻവറിന്റെ പരാമർശം ഉണ്ടായത്.

പ്രാർഥനപോലുള്ള ഇത്തരം അനാവശ്യ ചടങ്ങുകൾ ഒഴിവാക്കിക്കൂടേയെന്ന് എംഎൽഎ ചോദിച്ചു. നിയമസഭയിൽ ഇക്കാര്യം ഉന്നയിക്കുമെന്നും അദ്ദേഹം പറഞ്ഞു. മഞ്ചേരി മുനിസിപ്പൽ ടൗൺ ഹാളിൽ മന്ത്രി കെ.രാജൻ ദീപം തെളിച്ച് പട്ടയമേള ഉദ്ഘാടനം ചെയ്യുന്നതിനു മുൻപ് റവന്യു ജീവനക്കാരനാണ് പ്രാർഥനാഗീതം ആലപിച്ചത്.