ഗവർണർ വിവരം കെട്ടവനെന്ന് എം.എം. മണി, വാർത്താസമ്മേളനം കോഴി കോട്ടുവായെന്ന് കാനം

തൃശൂർ. ഗവർണർ ആരിഫ് മുഹമ്മദ് ഖാൻ വിവരം കെട്ടവനാണെന്നും, പമ്പര വിഡ്ഢിയാണെന്നും ബുദ്ധിശൂന്യനെന്നും എം.എം. മണി എം.എൽ.എയുടെ കടന്നാക്രമണം. കെ.കെ. രാഗേഷിനും മുഖ്യമന്ത്രി പിണറായി വിജയനുമെതിരായ ഗവർണറുടെ ആരോപണങ്ങൾ വിഡ്ഢിത്തമാണെന്നും ഗവർണർ പമ്പര വിഡ്ഢിയായി മാറിയെന്നും മണി തൃശ്ശൂരിൽ പരിഹസിച്ചു.

ഗവർണർ ആരിഫ് മുഹമ്മദ് ഖാനെ കടന്നാക്രമിച്ച് എം.എം. മണി എം.എൽ.എ തുടർന്ന് പറഞ്ഞത് ഇങ്ങനെ. ‘ഇത്രയും ബുദ്ധിശൂന്യനെ ഗവർണറായി കേന്ദ്രം അടിച്ചേൽപ്പിച്ചത് മര്യാദകേടാണ്. ആർ.എസ്.എസ് നേതാവ് മോഹൻ ഭാഗവതിനെ കാണാൻ പോയതോടെ ഗവർണറാരാണെന്ന് വ്യക്തമായി. ഇരിക്കുന്ന പദവിയോട് ഗവർണർ നീതി പുലർത്തിയില്ല. വിവരംകെട്ട ഗവർണർ എത്രയും വേഗം രാജിവെച്ച് ഒഴിയുന്നതാണ് കേരളത്തിന് നല്ലത്. ഗവർണറെ പിന്താങ്ങിയിരുന്ന വി.ഡി. സതീശൻ ഇനിയെന്ത് പറയുമെന്ന് അറിയണമെന്നും മണി പറയുകയുണ്ടായി.

ഗവർണർ ആരിഫ് മുഹമ്മദ് ഖാനെതിരെ രൂക്ഷ വിമർശനവുമായി രംഗത്ത് വന്ന സി.പി.ഐ സംസ്ഥാന സെക്രട്ടറി കാനം രാജേന്ദ്രൻ, ഗവർണറുടെ വാർത്താ സമ്മേളനം ‘കോഴി കോട്ടുവാ ഇട്ടതുപോലെ’യാണെന്നാണ് പരിഹസിച്ചത്. ഗവർണറുടെ നടപടി ഭരണഘടനാ ലംഘനമാണ്. ജീവിതകാലം മുഴുവൻ ബില്ലിൽ ഒപ്പിടാതിരിക്കാൻ ഗവ‌ർണർക്കാവില്ല.

അതിന് ഭരണഘടനയും നിയമവുമുണ്ട്. അതനുസരിച്ച് എൽ.ഡി.എഫ് സർക്കാർ മുന്നോട്ടുപോകും. തികച്ചും ബാലിശമായ വാദഗതികളാണ് ഗവ‌ർണറുടേത് – കാനം പറഞ്ഞു. രണ്ട് ഭരണഘടനാ സ്ഥാപനങ്ങൾ തമ്മിലുള്ള കത്തിടപാട് പ്രസിദ്ധപ്പെടുത്താൻ ഏത് ഭരണഘടനാ വകുപ്പാണ് പറയുന്നത്. കേരളത്തിന്റെ ഗവർണർ രാജ്യത്തെ ഭരണഘടന ലംഘിച്ചിരിക്കുകയാ ണെന്നും കാനം കുറ്റപ്പെടുത്തുകയുണ്ടായി.