കാലങ്ങളോളം അധ്വാനിച്ച് ബിജെപിയ്ക്ക് രൂപം നല്‍കി; അദ്വാനിക്ക് പിറന്നാള്‍ ആശംസകളുമായി മോദി

92ാം പിറന്നാള്‍ ദിനത്തില്‍ ബി.ജെ.പിയുടെ മൂതിര്‍ന്ന നേതാവ് എല്‍.കെ അദ്വാനിക്ക് ആശംസകളുമായി പ്രധാനമന്ത്രി നരേന്ദ്ര മോദി. അദ്വാനി പണ്ഡിതനും രാഷ്ട്രതന്ത്രജ്ഞനും ഇന്ത്യയിലെ ഏറ്റവും ബഹുമാനിക്കപ്പെടുന്ന നേതാവുമാണെന്ന് മോദി പിറന്നാള്‍ ആശംസയില്‍ കുറിച്ചു.

പിറന്നാൾ ആശംസകൾ നേരാൻ അദ്വാനിയുടെ വസതിയിലെത്തിയ മോദി അദ്ദേഹത്തിന്​ പൂച്ചെണ്ട്​ സമ്മാനിച്ചു. ബി.ജെ.പി ദേശീയാധ്യക്ഷനും ആഭ്യന്തരമന്ത്രിയുമായ അമിത്​ ഷാ, വർക്കിങ്​ പ്രസിഡൻറ്​ ജെ.പി നഡ്ഡ, ഉപാരാഷ്​ട്രപതി വെങ്കയ്യ നായിഡു എന്നിവരും  ആശംസകളുമായി അദ്വാനിയുടെ വസതിയിലെത്തി

”അദ്വാനിജിയ്ക്ക് പൊതുപ്രവര്‍ത്തനം എപ്പോഴും മൂല്യങ്ങളുമായി ബന്ധപ്പെട്ടിരിക്കുന്നു. ഒരിക്കല്‍ പോലും അദ്ദേഹം അടിസ്ഥാന പ്രത്യയശാസ്ത്രത്തില്‍ വിട്ടുവീഴ്ച ചെയ്തില്ല. നമ്മുടെ ജനാധിപത്യത്തിന് സംരക്ഷണം ആവശ്യം വന്നപ്പോള്‍ അദ്ദേഹം മുന്‍പന്തിയിലായിരുന്നു. മന്ത്രി എന്ന നിലയില്‍ അദ്ദേഹത്തിന്റെ കഴിവുകള്‍ സാര്‍വത്രികമായി അംഗീകരിക്കപ്പെട്ടു”- മോദി ട്വീറ്റ് ചെയ്തു.

ബി.ജെ.പിക്ക് രൂപവും കരുത്തും നല്‍കാനായി അദ്ദേഹം പതിറ്റാണ്ടുകളോളം അധ്വാനിച്ചു. ആ അധ്വാനം ബി.ജെ.പിയെ ഇന്ത്യന്‍ രാഷ്ട്രീയത്തിലെ നിര്‍ണായക ശക്തിയാക്കി മാറ്റിയെന്നും മോദി പറഞ്ഞു.

1927 ല്‍ കറാച്ചിയിലാണ് എല്‍.കെ അദ്വാനി ജനിക്കുന്നത്. വിഭജനത്തിന് ശേഷം അദ്ദേഹത്തിന്റെ കുടുംബം ഇന്ത്യയിലേക്ക് കുടിയേറി. ബി.ജെ.പിയുടെ സ്ഥാപകാംഗങ്ങളില്‍ഒരാളായ അദ്ദേഹം ഏറ്റവും കൂടുതല്‍ കാലം ബി.ജെ.പി പ്രസിഡന്റായിരുന്ന വ്യക്തിയുമാണ്. മോദി പ്രധാനമന്ത്രിയായ ശേഷം സജീവമല്ലാത്ത അദ്ദേഹം ഇപ്പോള്‍ വിശ്രമ ജീവിതത്തിലാണ്