മോദി മനുഷ്യത്വവും കരുണയും നിറഞ്ഞ വ്യക്തിയെന്ന് ഗുലാം നബി ആസാദ്

ന്യൂഡല്‍ഹി. പ്രധാനമന്ത്രി നരേന്ദ്രമോദി പരുക്കനായ ഒരു വ്യക്തിയാണെന്നാണ് താന്‍ ആദ്യം കരുതിയത് എന്നാല്‍ മോദി മനുഷ്യത്വവും കരുണയും നിറഞ്ഞ വ്യക്തിയാണെന്ന് ഗുലാം നബി ആസാദ് പറഞ്ഞു. രാജ്യസഭയില്‍ ഗുലാം നബി ആസാദ് വരമിച്ചപ്പോള്‍ പ്രധാനമന്ത്രി കണ്ണീരണിഞ്ഞ സംഭവത്തെ കുറിച്ച് പ്രതികരിക്കുകയായിരുന്നു അദ്ദേഹം.

താന്‍ വിരമിക്കുന്നതിനെക്കുറിച്ചല്ല മറ്റൊരു കാര്യത്തെക്കുറിച്ചോര്‍ത്താണ് മോദി കണ്ണീരണഞ്ഞതെന്ന് ഗുലാം നബി ആസാദ് പറയുന്നു. 2006-ല്‍ ഗുജറാത്തില്‍ നിന്നുള്ള ഏതാനും വിനോദസഞ്ചാരികള്‍ കശ്മീരില്‍ എത്തിയിരുന്നു. എന്നാല്‍ സന്ദര്‍ശനത്തിനിടെ ഗ്രനേഡ് ആക്രമണത്തില്‍ അവര്‍ കൊല്ലപ്പെട്ടു. അന്ന് താന്‍ കാശ്മീര്‍ മുഖ്യമന്ത്രിയും മോദി ഗുജറാത്ത് മുഖ്യമന്ത്രിയുമായിരുന്നു. വിവരങ്ങള്‍ അറിയുവാന്‍ മോദി തന്നെ വിളിച്ചിരുന്നു. എന്നാല്‍ സംസാരിക്കുന്നതിനിടെയില്‍ താന്‍ വിങ്ങിപ്പൊട്ടുകയായിരുന്നു.

തുടര്‍ന്ന് സംസാരിക്കുവാന്‍ പോലും കഴിയാത്ത അവസ്ഥയായിരുന്നു. കരച്ചില്‍ ഫോണിലൂടെ അദ്ദേഹം കേള്‍ക്കുകയും ചെയ്തു. മരിച്ചവരുടെ മൃതദേഹം വിമാനത്തില്‍ കൊണ്ടുപോകുമ്പോഴും താന്‍ കരഞ്ഞിരുന്നു. പിന്നീട് അദ്ദേഹത്തെ വിളിക്കുവാൻ ശ്രമിച്ചെങ്കിലും അത് സാധിച്ചില്ല. എങ്കിലും അദ്ദേഹം നിത്യവും വിളിക്കുമായിരുന്നു. ഗുലാം നബി ആസാദ് പറയുന്നു.

കോണ്‍ഗ്രസില്‍ നിന്നും പുറത്ത് പോകുവാന്‍ താന്‍ നിര്‍ബന്ധിനാവുകയായിരുന്നു. തന്നെ ആവശ്യമില്ലെന്ന തോന്നലാണ് തനിക്ക് കോണ്‍ഗ്രസില്‍ നില്‍ക്കുമ്പോള്‍ ലഭിച്ചത്. കോണ്‍ഗ്രസിന് തന്നോട് എപ്പോഴും നീരസം ഉണ്ടായിരുന്നുവെന്നും അദ്ദേഹം പറയുന്നു.

രാഹുല്‍ ഗാന്ധി വൈസ് പ്രസിഡന്റായി കോണ്‍ഗ്രസില്‍ എത്തിയത് മുതലാണ് പാര്‍ട്ടി തകര്‍ച്ചയിലേക്ക് എത്തിയതെന്ന് ഗുലാം നബി ആസാദ് മുമ്പ് പറഞ്ഞിരുന്നു. രാജിക്കത്തില്‍ കോണ്‍ഗ്രസിനെതിരെയും രാഹുല്‍ ഗാന്ധിക്കെതിരെയും രൂക്ഷമായ വിമര്‍ശനമാണ് അദ്ദേഹം ഉന്നയിച്ചത്.