ട്രെയിൻ ദുരന്ത ഭൂമിയിൽ മോദിയെത്തി, ദുരന്തം നടന്ന സ്ഥലവും ആശുപത്രിയിൽ ചികിത്സയിൽ കഴിയുന്നവരെയും മോദി  സന്ദർശിക്കും

ബാലസോർ . ട്രെയിൻ ദുരന്തം നടന്ന ഒഡ‍ീഷയിൽ സ്ഥിതിഗതികൾ വിലയിരു ത്താനും ആശുപത്രിയിൽ ചികിത്സയിൽ കഴിയുന്നവരെ  സന്ദർശിക്കാനുമായി പ്രധാനമന്ത്രി നരേന്ദ്ര മോദി എത്തി. ദുരന്തം നടന്ന സ്ഥലവും ആശുപത്രിയിൽ ചികിത്സയിൽ കഴിയുന്നവരെയും മോദി  സന്ദർശിക്കുന്നുണ്ട്. സ്ഥിതിഗതികൾ വിലയിരുത്താനായി പ്രധാനമന്ത്രി അടിയന്തര യോഗം വിളിച്ചു ചേർത്തിരുന്നു. ഇതിനു പിറകെയാണ്  പ്രധാനമന്ത്രി അപകടസ്ഥലം സന്ദർശിക്കുമെന്നു പ്രഖ്യാപിക്കുന്നത്.

റെയിൽവേ മന്ത്രി അശ്വിനി വൈഷ്ണവുമായി സംസാരിച്ച വിവരവും പരുക്കേറ്റവക്ക് സാധ്യമായ എല്ലാ സഹായങ്ങളും നൽകുമെന്നും  പ്രധാനമന്ത്രി കഴിഞ്ഞ ദിവസം ട്വീറ്റ് ചെയ്തിരുന്നു. ബാലസോർ ട്രെയിൻ അപകടത്തിൽ 238 പേരാണ് മരണപ്പെട്ടത്. 650 ലേറെ പേർക്ക്  അപകടത്തിൽ പരുക്കേറ്റു. പാളം തെറ്റിയ കോച്ചുകളിൽ കുടുങ്ങിയവരെ രക്ഷപ്പെടുത്താനുള്ള ശ്രമം നടന്നു വരുകയാണ്.

തകർന്ന കോച്ചുകൾക്കിടിയിൽ നിരവധി പേർ കുടുങ്ങിക്കിടക്കുന്നുണ്ടെന്നാണ് പുറത്ത് വന്നിട്ടുള്ള റിപ്പോർട്ടുകൾ പറയുന്നത്. ബാലസോർ ജില്ലയിലെ ബഹനാഗ ബസാർ സ്റ്റേഷനു സമീപം പാളം തെറ്റി തൊട്ടടുത്ത ട്രാക്കിലേക്കു മറിഞ്ഞ ബെംഗളൂരു – ഹൗറ 12864 നമ്പർ സൂപ്പർ ഫാസ്റ്റ് എക്സ്പ്രസിലേക്ക് കൊൽക്കത്തയിലെ ഷാലിമാറിൽ നിന്നു ചെന്നൈ സെൻട്രലിലേക്ക് വരുകയായിരുന്ന കൊറമാണ്ഡൽ എക്സ്പ്രസ് (12841) ഇടിച്ചുകയറിയാണ് അപകടം ഉണ്ടാവുന്നത്. മറിഞ്ഞുകിടന്ന കൊറമാണ്ഡൽ എക്സ്പ്രസിന്റെ കോച്ചുകളിലേക്ക് മറ്റൊരു ട്രാക്കിലൂടെ വന്ന ഗുഡ്സ് ട്രെയിനും ഇടിച്ചുകയറിയത് ദുരന്തത്തിന്റെ ആഘാതം കൂട്ടി.

വെള്ളിയാഴ്ച രാത്രി 7.20നായിരുന്നു അപകടം ഉണ്ടാവുന്നത്. വ്യോമസേന, ദേശീയ ദുരന്തനിവാരണ സേന, റെയിൽവേ സുരക്ഷാ സേന, ഒഡീഷ ദുരന്തനിവാരണ സേന ഉൾപ്പെടെ രക്ഷാപ്രവർത്തനത്തിനു റാണത്ത് ഉണ്ട്. അപകടകാരണം കണ്ടെത്താൻ റെയിൽവേ ഉന്നതതല അന്വേഷണം പ്രഖ്യാപിച്ചിരിക്കുകയാണ്. രാഷ്ട്രപതി ദ്രൗപദി മുർമു, പ്രധാനമന്ത്രി നരേന്ദ്ര മോദി തുടങ്ങിയവർ സംഭവത്തിൽ അനുശോചിക്കു കയുണ്ടായി. കേന്ദ്ര റെയിൽവേ മന്ത്രി അശ്വിനി വൈഷ്ണവ് സംഭവസ്ഥലം സന്ദർശിച്ചു. ഒഡീഷ മുഖ്യമന്ത്രി നവീൻ പട്നാടിക്കും അപകട സ്ഥലം സന്ദർശിക്കുകയുണ്ടായി.