ഈ കൂട്ടനിലവിളിയിൽ പങ്ക് ചേർന്നേ പറ്റൂ, മുല്ലപെരിയാർ വിഷയത്തിൽ മുരളി ഗോപി

പൃഥ്വിരാജിനും ഉണ്ണി മുകുന്ദനും പിന്നാലെ മുല്ലപ്പെരിയാർ വിഷയത്തിൽ പ്രതികരണവുമായി നടനും തിരക്കഥാകൃത്തുമായ മുരളി ഗോപി രം​ഗത്തെത്തി. എല്ലാവരും മുല്ലപ്പെരിയാർ വിഷയത്തിൽ പങ്കുചേരണമെന്ന് അദ്ദേഹം ഫേസ്ബുക്കിലൂടെ വ്യക്തമാക്കി. ഓരോ ദുരന്ത സന്ധിയിലും ഉയർന്നു കേൾക്കുന്ന, എന്നാൽ ആരും ഇന്നേവരെ ചെവിക്കൊള്ളാൻ കൂട്ടാക്കാത്ത, ഒരു കൂട്ട നിലവിളിയാണിതെങ്കിലും ഏവരും ഇതിൽ പങ്ക് ചേർന്നേ പറ്റൂ. കാരണം, ഒച്ചയിട്ടാലേ സത്യത്തിന് പോലും ഇവിടെ മെച്ചമുള്ളൂ’, അദ്ദേഹം പറഞ്ഞു.

മുല്ലപ്പെരിയാർ വിഷയത്തിൽ പൃഥ്വിരാജ് ഉൾപ്പെടെ സിനിമ മേഖലയിൽ നിന്നും നിരവധി പേർ പ്രതികരണം അറിയിച്ച് രംഗത്ത് എത്തിയിട്ടുണ്ട്. 120 വർഷത്തോളം പഴക്കമുള്ള ഒരു ഡാം പ്രവർത്തിക്കുന്നതിന് എന്ത് ഒഴിവുകഴിവ് പറഞ്ഞാലും അത് സമ്മതിക്കാനാവില്ല. രാഷ്ട്രീയവും സാമ്പത്തികവുമായ കാര്യങ്ങൾ മാറ്റി വെച്ച് ശരി എന്തോ അത് ചെയ്യാനുള്ള സമയമായി എന്ന് പൃഥ്വിരാജ് പറഞ്ഞു.

അതേസമയം മുല്ലപ്പെരിയാർ ഡാമിൽ ജലനിരപ്പ് ഉയർന്നുകൊണ്ടിരിക്കുകയാണ്. ഇന്ന് രാവിലെ ഏഴ് മണിക്ക് ഒടുവിൽ ലഭിച്ച വിവരം പ്രകാരം ജലനിരപ്പ് 137 അടി പിന്നിട്ടു. ശക്തമായ നീരൊഴുക്കാണ് ജലനിരപ്പ് ഉയരാൻ കാരണമായിരിക്കുന്നത്. ഇതോടെ തമിഴ്‌നാട് കേരളത്തിന് ആദ്യ മുന്നറിയിപ്പ് നൽകി. കഴിഞ്ഞ ദിവസം രാത്രി മഴ ശക്തിയാർജ്ജിച്ചതോടെ സെക്കന്റിൽ അയ്യായിരത്തി അറുനൂറ്റിയമ്പത് ഘനയടി വെള്ളം അണക്കെട്ടിലേക്ക് ഒഴുകിയെത്തുന്നുണ്ട്. തമിഴ്‌നാട് 2150 ഘനയടി വെള്ളമാണ് കൊണ്ടുപോകുന്നത്.