സർവീസ് നടത്തുന്ന 90% കെഎസ്ആർടിസി ബസുകൾക്കും ഇൻഷുറൻസ് പരിരക്ഷയില്ല ; കണ്ണടച്ച്‌ എംവിഡി

തിരുവനന്തപുരം: നിരത്തിലോടുന്ന 90% കെഎസ്ആർടിസി ബസുകൾക്കും ഇൻഷുറൻസ് പരിരക്ഷയില്ല. ശബരിമലയിലും സ്ഥിതി വ്യത്യസ്തമല്ല. ഭക്തരുമായി പോകുന്ന ബസുകൾക്ക് ഇൻഷുറൻസ് കാലാവധി കഴിഞ്ഞിട്ട് രണ്ട് വർഷത്തിലധികമായെന്നാണ് വിവരം. കെഎസ്ആർടിസി ആകട്ടെ പമ്പ, നിലയ്‌ക്കൽ പാതയിൽ യാത്ര ചെയ്യുന്ന ശബരിമല തീർത്ഥാടകരെ പിഴിഞ്ഞ് നഷ്ടം നികത്തുന്ന ഓട്ടത്തിലാണ്. യാത്രക്കാരായ ഭക്തരുടെ സുരക്ഷയ്‌ക്കും മോട്ടോർ വാഹന നിയമങ്ങൾക്കും യാതൊരു വിലയും കൽപിക്കുന്നില്ലെന്നാണ് ഇത് വ്യക്തമാക്കുന്നത്.

കെഎസ്ആർടിസിയുടെ ഈ പരസ്യമായ നിയമലംഘനത്തിന് മോട്ടോർ വാഹന വകുപ്പിന്റെ മൗനസമ്മതം ഉണ്ടെന്നതും വ്യക്തമാണ്. സ്വകാര്യ ബസുകളുടെ ചെറിയ നിയമ ലംഘനങ്ങൾക്ക് പോലും കർശന നിയമ നടപടികൾ സ്വീകരിക്കുന്ന മോട്ടോർ വാഹന വകുപ്പിന്റെ മൂക്കിന് കീഴിലാണ് ഇതെല്ലാം നടക്കുന്നത് എന്നത് ഓർക്കേണ്ടതുണ്ട്.

ഒരു വാഹനത്തിന് 60,000 രൂപയാണ് ഇൻഷുറൻസ് തുകയായി ചിലവഴിക്കേണ്ടി വരിക. ഇത്തരത്തിൽ ഒരു വർഷം 12 കോടി രൂപ ഇൻഷുറൻസിനായി മാറ്റിവെയ്‌ക്കാൻ ആകണം. ജീവനക്കാർക്ക് ശമ്പളം പോലും സമയത്ത് കൊടുക്കാൻ കഴിയാത്ത അവസ്ഥയിലാണ് ഇപ്പോൾ കെഎസ്ആർടിസി.

ഇൻഷുറൻസ് ഇല്ലാത്ത ബസുകൾ അപകടത്തിൽപ്പെട്ടാൽ സ്വന്തം നിലയ്‌ക്ക് നഷ്ടപരിഹാരം നൽകുമെന്നാണ് കെഎസ്ആർടിസിയുടെ വാദം. കൃത്യമായി ശമ്പളം കൊടുക്കാൻ പണമില്ലാത്ത കോപ്പറേഷൻ നഷ്ടപരിഹാരം എങ്ങനെ നൽകും എന്നതും ആലോചിക്കണം.