ഇന്ത്യയുടെ സൂചിമുനയോളം ഭൂമി പോലും ആർക്കും കയ്യേറാൻ ആവില്ല -അമിത്ഷാ

ന്യൂ ഡൽഹി . അരുണാചൽ പ്രദേശ് കയ്യേറാനുള്ള ചൈനയുടെ ശ്രമങ്ങളെ ശക്തമായി വിമർശിച്ച് കേന്ദ്ര ആഭ്യന്തര മന്ത്രി അമിത് ഷാ. ഇന്ത്യൻ ഭൂമി ആർക്കും കയ്യേറാനാകില്ല. അതിർത്തികളിൽ സൈന്യം രാവും പകലും കാവലുണ്ട് – അമിത് ഷാ പറഞ്ഞു. ചൈനയുമായി അതിർത്തി പങ്കിടുന്ന അരുണാചലിലെ കിബിത്തൂവിൽ ‘വൈബ്രന്റ് വില്ലേജസ് പ്രോഗ്രാം’ ഉദ്ഘാടനം ചെയ്തു സംസാരിക്കുമ്പോഴാണ് അമിത്ഷാ ചൈനക്കെതിരെ ആഞ്ഞടിച്ചത്. ആർമിയുടെയും ഐടിബിപി ഉദ്യോഗസ്ഥരുടെയും ധീരതയെ പ്രശംസിച്ച അമിത് ഷാ, ഇന്ത്യയുടെ മേൽ ആർക്കും ഒരു ദുഷിച്ച കണ്ണ് വീശാനാകില്ലെന്ന മുന്നറിയിപ്പും നൽകുകയുണ്ടായി.

‘ഇന്ത്യയുടെ സൂചിമുനയോളം ഭൂമി പോലും ആർക്കും കയ്യേറ്റം ചെയ്യാൻ കഴിയില്ല. നമ്മുടെ ഐടിബിപി ജവാൻമാർ അതിർത്തികളിൽ രാവും പകലും കാവലിരിക്കുന്നുണ്ട്. അതുകൊണ്ട് രാജ്യത്തിനാകെ ഇന്ന് അവരവരുടെ വീടുകളിൽ സ്വസ്ഥമായി ഉറങ്ങാൻ കഴിയും. നമ്മുടെ മേൽ ദുഷിച്ച കണ്ണ് വീശാൻ പോലും ആർക്കും കഴിയില്ല’ അമിത് ഷാ പറഞ്ഞു.

‘വടക്കുകിഴക്കൻ മേഖല 2014-ന് മുമ്പ് അസ്വസ്ഥമായ പ്രദേശമായാണ് അറിയപ്പെട്ടി രുന്നത്. എന്നാൽ കഴിഞ്ഞ ഒമ്പത് വർഷമായി പ്രധാനമന്ത്രി മോദിയുടെ ഭരണത്തിന് കീഴിൽ രാജ്യത്തിന്റെ വികസനത്തിന് സംഭാവന നൽകുന്ന മേഖലയായി വടക്കുകിഴക്ക് മാറി’ – അമിത് ഷാ പറഞ്ഞു. അരുണാചൽ പ്രദേശിലെ ചില സ്ഥലങ്ങൾ ചൈനയുടെ ഭാഗമാണെന്ന് അവകാശപ്പെട്ട് ഇവയെ പുനർനാമകരണം ചെയ്തിരുന്നു. ഇതിന് മറുപടിയായാണ് അമിത് ഷായുടെ പ്രസ്താവന ഉണ്ടായത്.

സംസ്ഥാനത്തിന് മേലുള്ള അവകാശവാദം ഉറപ്പിക്കുന്നതിന്റെ ഭാഗമായി അരുണാചൽ പ്രദേശിനായി ചൈനീസ്, ടിബറ്റൻ, പിൻയിൻ എന്നീ അക്ഷരങ്ങളിൽ മൂന്നാം സെറ്റ് പേരുകൾ മാസം ആദ്യം ചൈന പുറത്തുവിട്ടിരുന്നു. ചൈനയുടെ കാബിനറ്റ് സ്റ്റേറ്റ് കൗൺസിൽ പുറപ്പെടുവിച്ച ഭൂമിശാസ്ത്രപരമായ പേരുകൾ സംബന്ധിച്ച ചട്ടങ്ങൾക്കനുസൃതമായി, അരുണാചൽ പ്രദേശിന്റെ 11 സ്ഥലങ്ങളുടെ സ്റ്റാൻഡേർഡ് പേരുകൾ ചൈനയുടെ സിവിൽ അഫയേഴ്സ് മന്ത്രാലയം ആണ് പുറത്ത് വിറ്റിരുന്നത്.