വായ്പാ ആപ്പുകളുടെ ഭീഷണിയിൽ ആയിരങ്ങൾ, പണം തിരികെ ലഭിക്കാൻ മോർഫിങ്, ഒന്നും ചെയ്യാനാകാതെ പോലീസ്

തിരുവനന്തപുരം : സംസ്ഥാനത്ത് വായ്പാ ആപ്പുകളുടെ കെണിയിൽ കുടുങ്ങി നിരവധി കുടുംബങ്ങൾ വലയുന്നു. എന്നാൽ ഇതിൽ പൊലീസിന് ഒന്നും ചെയ്യാനാകാത്ത അവസത്തയാണ്. പരാതി വരുമ്പോൾ കേസെടുത്താലും ആപ്പുകൾക്കെതിരെ ഒന്നും ചെയ്യാൻ കഴിയുന്നില്ല. ഓൺലൈൻ ഗെയിമുകളുടെ കാര്യത്തിൽ പലപ്പോഴും ആപ്പുകൾ നിരോധിക്കപ്പെടുന്നുണ്ടെങ്കിലും വായ്പാ ആപ്പുകൾ അങ്ങനെയല്ല.

ജനങ്ങൾക്ക് ഇതേക്കുറിച്ച് ബോധവൽക്കരണം നൽകാമെന്നല്ലാതെ മറ്റൊന്നും ചെയ്യാനാകില്ല. ഇതിനെതിരെ ബോധവൽക്കരണത്തിന് പൊലീസ് ലക്ഷ്യമിടുന്നുണ്ട്. ആയിരത്തോളം പൊലീസുദ്യോഗസ്ഥർക്ക് സൈബർ ഓപ്പറേഷൻസിൽ പരിശീലനം നൽകുന്നു. ഇതിൽ ആദ്യ 300 പേർ പരിശീലനം പൂർത്തിയാക്കിയിട്ടുണ്ട്.
ഇത്തരം അപ്പുകളിലെ ചതിയാണ് നാം ആദ്യ,എം മനസിലാക്കേണ്ടത്.

ഇത്തരം ആപ്പുകൾ ഡൗൺലോഡ് ചെയ്യുന്ന ഘട്ടത്തിൽ ഫോണിലെ കോൺടാക്ട് നമ്പറുകളും ഗാലറിയും വിഡിയോകളുമെല്ലാം ആക്സസ് ചെയ്യാനുള്ള അനുമതി തേടുന്നുണ്ട്. പണം കിട്ടാനുള്ള തിടുക്കത്തിൽ ഇതിനെല്ലാം അനുമതി നൽകും. ഇതാണ് ആദ്യ കുരുക്ക്. കോൺടാക്ട് ഉൾപ്പെടെ ആക്സസ് ചെയ്യാൻ അനുമതി നിഷേധിക്കണം. ഇതാണ് ആദ്യം വേണ്ടത്

ഇത്തരം കെണികളിൽ കുടുങ്ങി എന്ന് മനസിലാക്കുന്ന അവസ്ഥയിൽ തന്നെ പോലീസിനെ സമീപിക്കാനാണ് നിർദേശം. പണം തിരിച്ചടച്ചില്ലെങ്കിലും ഈ ആപ്പുകൾക്ക് ഒന്നും ചെയ്യാൻ കഴിയില്ല. പണം ഇൗടാക്കാൻ ആപ്പ് നിയന്ത്രിക്കുന്നവർക്ക് മാർഗമില്ല. അതുകൊണ്ടാണ് ഭീഷണിപ്പെടുത്തുന്നതും നിങ്ങളുടെ ചിത്രം പ്രൊഫൈലുകളിൽ നിന്നോ സമൂഹമാധ്യമത്തിൽ നിന്നോ എടുത്ത് മോർഫ് ചെയ്ത് ബന്ധുക്കൾക്ക് ഉൾപ്പെടെ അയച്ചു കൊടുക്കുന്നതിലേക്കും അവർ കടക്കുന്നത്. ഭീഷണി സന്ദേശങ്ങൾ സേവ് ചെയ്യാനും വിളിക്കുന്ന ഫോൺ നമ്പർ കുറിച്ചു വയ്ക്കാനും മറക്കരുതെന്നും പോലീസ് പറയുന്നു.