‘അങ്ങനെ ആ ഒരു തരി കനലും കെട്ടു’ സഖാക്കൾക്ക് പത്മജയുടെ പരിഹാസം.

‘അങ്ങനെ ആ ഒരു തരി കനലും കെട്ടു’ എന്ന് കോൺഗ്രസ് നേതാവ് പദ്മജ വേണുഗോപാലിന്റെ ഫേസ് ബുക്ക് പോസ്റ്റ്. ഷിംല കോർപ്പറേഷനിലെ സിപിഎം അംഗം ബിജെപിയിൽ ചേർന്ന വാർത്ത കോൺഗ്രസ് നേതാവ് പദ്മജ വേണുഗോപാൽ ഫേസ് ബുക്കിൽ പങ്കുവെച്ചിരുന്നു. ‘അങ്ങനെ ആ ഒരു തരി കനലും കെട്ടു’ എന്ന് പറഞ്ഞുകൊണ്ടാണ് പദ്മജ വാർത്ത പങ്കുവെച്ചിരിക്കുന്നത്. കഴിഞ്ഞദിവസമാണ് ഷിംലയിലെ സിപിഎം കൗണ്‍സിലര്‍ ഷെല്ലി ശര്‍മ്മ ബിജെപിയിൽ ചേർന്നത്. ഈ വാർത്തയുടെ ചിത്രം പങ്കുവെച്ചുകൊണ്ടാണ് പദ്മജ സഖാക്കളെ പരിഹസിച്ചിരിക്കുന്നത്.

കോൺഗ്രസിൽ നിന്ന് ബിജെപിയിൽ പോകുന്നവരുടെ എണ്ണം സഖാക്കൾ നോക്കിക്കൊണ്ടിരുന്നപ്പോൾ, സ്വന്തം പാർട്ടിക്കാരൻ ബിജെപിയിലേക്ക് പോയത് അറിഞ്ഞില്ലെന്നാണ് പദ്മജ കുറിച്ചിരിക്കുന്നത്. ഈ വാർത്തയിൽ സന്തോഷിക്കാൻ താനില്ലെന്നും പദ്മജ ഫേസ്ബുക്ക് പോസ്റ്റിലൂടെ പറഞ്ഞിട്ടുണ്ട്. ‘ഏതായാലും ഈ വാർത്തയിൽ സന്തോഷിക്കാൻ ഞാനില്ല. കോൺഗ്രസിൽ നിന്നും ബിജെപിയിലേക്ക് പോകുന്നവരുടെ എണ്ണം എടുത്ത് സഖാക്കൾ പ്രചരിപ്പിക്കുമ്പോൾ, സ്വന്തം പാർട്ടിക്കാർ ബിജെപിയിൽ പോകാതെ ശ്രദ്ധിക്കണം എന്ന് സിപിഎമ്മുകാരോട് ഞാൻ അഭ്യർത്ഥിക്കുന്നു.’ പദ്മജ ഫേസ്ബുക്കിൽ കുറിച്ചിരിക്കുന്നു.

കഴിഞ്ഞദിവസമാണ് ഷിംല മുനിസിപ്പല്‍ കോർപറേഷനിലെ സിപിഎം അംഗം ബിജെപിയില്‍ ചേര്‍ന്നത്. സമ്മര്‍ ഹില്‍ ഡിവിഷനില്‍ നിന്നുള്ള കൗണ്‍സിലര്‍ ഷെല്ലി ശര്‍മ്മയാണ് ബിജെപിയില്‍ ചേരുന്നത്. ഇടതുപാര്‍ട്ടികളില്‍ നിന്നുള്ള നേതാക്കള്‍ ബിജെപിയില്‍ ചേരുന്നത് അഭിമാന നിമിഷമാണെന്നായിരുന്നു ബിജെപി ജില്ലാ അധ്യക്ഷന്‍ രവി മേഹ്ത ഷെല്ലിയെ സ്വീകരിക്കവെ പ്രതികരിച്ചത്.

പ്രധാനമന്ത്രി നരേന്ദ്രമോദി, മുഖ്യമന്ത്രി ജയ് റാം താക്കൂർ എന്നിവരുടെ പ്രവർത്തനങ്ങളിൽ ആകൃഷ്ടയായാണ് നേതാക്കൾ ബിജെപിയിലെത്തുന്നതെന്നാണ് രവി മേഹ്ത പറഞ്ഞിരുന്നത്. ബിജെപി ഷിംല മണ്ഡലം എക്സിക്യൂട്ടീവ് യോഗത്തിൽ വെച്ചായിരുന്നു ഷെല്ലിയുടെ ബിജെപി പ്രവേശനം നടക്കുന്നത്.