ഞാനും മമ്മൂട്ടിയു തമ്മിലായിരുന്നില്ല പ്രശ്‌നം, പാര്‍വ്വതി പറയുന്നു

മമ്മൂട്ടിയുടെ കസബയിലെ കഥാപാത്രത്തിനെതിരെ പാര്‍വ്വതി വിമര്‍ശനം ഉന്നയിച്ചത് വലിയ വിവാദമായിരുന്നു. ഇതിന് പിന്നാലെ മമ്മൂട്ടിയുടെ ആരാധകര്‍ പാര്‍വതിക്കെതിരെ വന്‍ സൈബര്‍ ആക്രമണമാണ് നടത്തിയത്. ഇപ്പോള്‍ മമ്മൂട്ടിക്ക് ഒപ്പം പുഴു എന്ന ചിത്രത്തില്‍ അഭിനയിക്കാന്‍ തയ്യാറെടുക്കുകയാണ് പാര്‍വതി. ചിത്രത്തിന്റെ പ്രഖ്യാപനത്തിന് പിന്നാലെ കസബ വിവാദം വീണ്ടും ഉയര്‍ന്നിരുന്നു. ഇപ്പോഴിതാ അത്തരം ചോദ്യങ്ങള്‍ക്ക് എല്ലാം മറുപടി നല്‍കിയിരിക്കുകയാണ് പാര്‍വതി. ഒരു ഓണ്‍ലൈന്‍ മാധ്യമത്തിന് അനുവദിച്ച അഭിമുഖത്തിലാണ് നടിയുടെ പ്രതികരണം.

പാര്‍വതിയുടെ വാക്കുകള്‍ ഇങ്ങനെ, ഞാന്‍ മുമ്പും പറഞ്ഞിട്ടുണ്ട്. അദ്ദേഹമൊരു അസാധ്യ നടനാണ്. അദ്ദേഹത്തിന്റെ അഭിനയം കണ്ടു തന്നെയാണ് ഞാനും വളര്‍ന്നത്. പക്ഷെ ഞാന്‍ അന്ന് പറഞ്ഞ രാഷ്ട്രീയത്തില്‍ തന്നെയാണ് ഇന്നും ഉറച്ചു നില്‍ക്കുന്നത്. അതില്‍ മാറ്റമൊന്നുമില്ല. അതിന് അദ്ദേഹവുമായി യാതൊരു ബന്ധവുമില്ല. ഞാന്‍ അദ്ദേഹത്തിനെതിരെ ഒന്നും പറഞ്ഞിരുന്നില്ല. അഭിനയം ഒരു ജുഗല്‍ബന്തിയാണ്. അവരെന്താണ് ടേബിളില്‍ ഇടുക എന്നറിയില്ല. പിന്നെ അത് എങ്ങനെ നമ്മുടേതാക്കി മാറ്റം എന്നത് വളരെ എക്‌സൈറ്റഡായ കാര്യമാണ്.

അതൊരു വലിയ തെറ്റിദ്ധാരണയാണ്. ഞാനും അദ്ദേഹവും തമ്മിലായിരുന്നില്ല പ്രശ്‌നം. എന്റെ പ്രശ്‌നം സിനിമയോടായിരുന്നു. പക്ഷെ അടുത്ത ദിവസം വന്ന പത്രത്തില്‍ കണ്ടത് പാര്‍വതി മമ്മൂട്ടിക്കെതിരെ എന്നാണ്. അവര്‍ക്ക് വേണ്ടത് വിവാദമാണ്. എന്നാല്‍ മാത്രമേ കൂടുതല്‍ ക്ലിക്ക് കിട്ടുകയുള്ളൂ. പക്ഷെ സത്യം നമുക്കറിയാമല്ലോ. അതുകൊണ്ട് ഗൗനിച്ചിരുന്നില്ല.