നേപ്പാളിൽ 72 പേരുമായി പറന്ന യാത്രാവിമാനം തകർന്നുവീണു; 30 യാത്രക്കാരുടെ മൃതദേഹം കണ്ടെത്തി

കാഠ്മണ്ഡു. നേപ്പാളിൽ 72 പേരുമായി പറന്ന യാത്രാവിമാനം തകർന്നുവീണു. പൊഖാറ വിമാനത്താവളത്തിനു സമീപമാണ് അപകടമുണ്ടായത്. യേതി എയർലൈൻസിന്റെ വിമാനമാണ് തകർന്നുവീണത്. കാഠ്മണ്ഡുവിൽ നിന്ന് പൊഖാറയിലേക്ക് പോകുകയായിരുന്നു വിമാനം. വിമാനം പൂർണ്ണമായി കത്തിയമർന്നു.

30 പേരുടെ മൃതദേഹം കണ്ടെടുത്തതായി പ്രാദേശികമാധ്യമങ്ങൾ റിപ്പോർട്ട് ചെയ്തു. രാവിലെ 11 മണിയോടെയാണ് സംഭവമുണ്ടായത്. വിമാനത്തിൽ 68 യാത്രക്കാരും നാല് ജീവനക്കാരുമാണ് ഉണ്ടായിരുന്നത്. പഴയ വിമാനത്താവളത്തിലും പൊഖാറ അന്തർദേശീയ വിമാനത്താവളത്തിനുമിടയിലാണ് അപകടമെന്ന് യേതി എയർലൈൻസ് വക്താവ് സുധർശൻ ബാർതുലയെ പറയുന്നു.

മോശം കാലാവസ്ഥയാണ് അപകടത്തിന് കാരണമെന്നാണ് പ്രാഥമിക നിഗമനം. നേപ്പാൾ പ്രധാനമന്ത്രി പുഷ്പ കമാൽ ദഹാൽ സംഭവത്തിൽ ദുഃഖം രേഖപ്പെടുത്തി. സുരക്ഷാ ജീവനക്കാരോടും സർക്കാരിന്റെ എല്ലാവിഭാഗങ്ങളോടും പൊതുജനങ്ങളോടും രക്ഷാപ്രവർത്തനത്തിന് തയ്യാറാവാൻ അദ്ദേഹം ആവശ്യപ്പെട്ടു