27 യാത്രക്കാരെ കയറ്റാതെ വിമാനം പറന്നു; നിശ്ചയിച്ച സമയത്തിനും മണിക്കൂറുകൾക്ക് മുൻപാണ് വിമാനം പോയത്

അമൃത്‌സർ. അമൃത്സറിൽ 27 യാത്രികരെ കയറ്റാതെ നിശ്ചയിച്ച സമയത്തിനും മണിക്കൂറുകൾക്ക് മുൻപ് വിമാനം പറന്നുയർന്നു. ബുധനാഴ്ചയാണ് സംഭവം. രാത്രി 7.55-ന് പുറപ്പടേണ്ടിരുന്ന സിംഗപ്പൂർ സ്‌കൂട്ട് എയർലൈൻസ് വിമാനമാണ് സമയം പുനക്രമീകരിച്ച് ഉച്ചയ്ക്ക് മൂന്നു മണിക്ക് പറന്നുയർന്നത്.

280 യാത്രക്കാർ സഞ്ചരിക്കാനിരുന്ന വിമാനത്തിൽ 253 പേർ മാത്രമാണ് യാത്ര ചെയ്തത്. യാത്ര നഷ്ടമായ യാത്രക്കാർ അധികൃതർക്ക് പരാതി നൽകിയിട്ടുണ്ട്. വിമാനത്തിന്റെ സമയമാറ്റം യാത്രക്കാരെ അറിയിച്ചിരുന്നുവെന്നാണ് എയർലൈൻസ് അധികൃതർ വ്യക്തമാക്കുന്നത്. തങ്ങൾ ഇ-മെയിൽ വഴി സന്ദേശം കൈമാറിയിട്ടുണ്ടെന്നും അധികൃതർ വ്യക്തമാക്കി.

30 പേർക്ക് ടിക്കറ്റെടുത്ത ട്രാവൽ ഏജന്റ് വിവരം കൈമാറാത്തതാണ് വിമാനയാത്ര നഷ്ടപ്പെടാൻ കാരണം. സംഭവത്തിൽ ഡിജിസിഎ അന്വേഷണം പ്രഖ്യാപിച്ചിട്ടുണ്ട്. സ്‌കൂട്ട് എയർലൈൻസ് അധികൃതരിൽനിന്നും അമൃത്‌സർ വിമാനത്താവളത്തിലെ അധികാരികളിൽ നിന്നും ഡിജിസിഎ വിശദാംശങ്ങൾ തേടി.

സമാനമായ സംഭവം ബെംഗളൂരു വിമാനത്താവളത്തിലും റിപ്പോർട്ട് ചെയ്തിരുന്നു. ഡൽഹി-ബെംഗളൂരു ഗോ ഫസ്റ്റ് വിമാനമാണ് 55-ഓളം യാത്രക്കാരെ കയറ്റാതെ പറന്നുയർന്നത്. ഇവർ ഷട്ടിൽ ബസിൽ വിമാനത്തിലേക്ക് പോകുന്നതിനിടയിലാണ് വിമാനം പറന്നുയർന്നത്. തുടർന്ന് ഇവർക്ക് മറ്റൊരു വിമാനത്തിൽ യാത്രക്കുള്ള സൗകര്യം ഒരുക്കി.