അർദ്ധചാലക മേഖലയിൽ നിക്ഷേപങ്ങളുടെ വലിയ അവസരമാണ് ഇന്ത്യ തുറന്ന് നൽകുന്നതെന്ന് പ്രധാനമന്ത്രി നരേന്ദ്രമോദി

ന്യൂഡല്‍ഹി. രാജ്യത്ത് അര്‍ദ്ധചാലക നിര്‍മാണത്തിനായി സാങ്കേതിക സ്ഥാപനങ്ങള്‍ക്ക് 50ശതമാനം സാമ്പത്തിക സഹായം നല്‍കുമെന്ന് പ്രധാനമന്ത്രി നരേന്ദ്രമോദി. രാജ്യത്ത് അര്‍ദ്ധചാലക വ്യവസായം വളരുന്നതിന് ആവശ്യമായ എല്ലാ സൗകര്യങ്ങളും ഉറപ്പാക്കുമെന്നും അദ്ദേഹം വ്യക്തമാക്കി. സെമികോണ്‍ ഇന്ത്യ 2023 കോണ്‍ഫറന്‍സ് ഉദ്യോഘാടനം ചെയ്തുകൊണ്ടായിരുന്നു പ്രധാനമന്ത്രി നരേന്ദ്രമോദിയുടെ പ്രഖ്യാപനം.

രാജ്യം അര്‍ദ്ധചാലക വ്യവസായത്തില്‍ വന്‍ വളര്‍ച്ച കൈവരിക്കും. ഒരു വര്‍ഷം മുമ്പ് വരെ ഇന്ത്യയില്‍ അര്‍ദ്ധചാലക മേഖലയില്‍ പണം നിക്ഷേപിക്കണം എന്ന് ആളുകള്‍ ചോദിച്ചിരുന്നു. എന്നാല്‍ ഇപ്പോള്‍ എന്ത് കൊണ്ട് നിക്ഷേപം നടത്തിക്കൂട എന്നാണ് ചോദിക്കുന്നത്. അര്‍ദ്ധചാലക മേഖലയില്‍ നിക്ഷേപങ്ങളുടെ വലിയൊരു ചാലകമായി ഇന്ത്യ മാറുകയാണെന്നും അദ്ദേഹം വ്യക്തമാക്കി.

ലോകത്തിന് മികച്ചതും വിശ്വസനീയവുമായ ചിപ്പ് വിതരണ ശൃംഖല ആവശ്യമാണെന്നും പ്രധാനമന്ത്രി പറഞ്ഞു. അര്‍ദ്ധചാലക രൂപകല്‍പ്പനയില്‍ കോഴ്‌സുകള്‍ ആരംഭിക്കുന്നതിനായി ഇന്ത്യയില്‍ 300 കോളേജുകള്‍ കണ്ടെത്തിയിട്ടുണ്ട്. ലോകം കണ്ട എല്ലാ വ്യവസായ വിപ്ലവവും വിവിധ കാലങ്ങളിലെ ജനങ്ങളുടെ അഭിലാഷങ്ങളാണെന്നും അദ്ദേഹം പറഞ്ഞു. ഇതും വിപ്ലവമായി മാറും. അര്‍ദ്ധചാലക മേഖലയില്‍ ഇന്ത്യയില്‍ അവസരം കൂടി വരുകയാണെന്നും പ്രധാനമന്ത്രി നരേന്ദ്ര മോദി വ്യക്തമാക്കി.